ابني عمره عامين و يتعبني جدا وقت الطعام؟

science-picky-eaters-vi.jpg

هذه مشكلة تعاني منها معظم الامهات مع الاطفال في هذا العمر. فالطفل بداية من عمر العامين يصبح روتيني جدا في اسلوب اكله فتجديه لا يريد سوى ان يآكل دجاج فقط طول الاسبوع في كل الوجبات او خبز فقط او نوع واحد فقط من الخضار! للآسف هذه هي طبيعة المرحلة العمرية لهم و حتى تزدادي حيرة فآن ذوق الطفل في الطعام خلال هذه المرحلة العمرية يتغير بين ليلة و ضحاها. بنتي مثلا كانت لا تآكل سوى البزلاء من جميع انواع الخضار اما الان هي لا تريد تناول و لو ملعقة واحدة منها!

اليكم بعض النصائح التي نصحني بها خبير تغذية الاطفال و طبيبة اطفالي الى جانب بعض المصادر الاخرى عن طريق الانترنت:

١. قدمي للطفل في هذا العمر ثلاث وجبات يوميا (افطار، غذاء، عشاء) هذا الى جانب وجبتان صغيرتان واحدة بين الافطار و الغذاء و الآخرى بين الغذاء و العشاء.

٢. احرصي على استغلال الوجبتان الصغيرتان في تعويض ما افتقده طفلك في الثلاث وجبات الرئيسية. على سبيل المثال قدمي بعض المكسرات لتعويض البروتين الذى افتقده جسم طفلك حينما رفض اكل اللحوم على الغذاء او قدمي كوب زبادي لتعوضي به عن اللبن او الجبن في الافطار و هكذا

٣. ثبتي مواعيد الوجبات في نفس الوقت من كل يوم

٤. اشرحي لطفلك ان وقت الطعام محدد و ان بعد وقت معين ستقومين برفع الطعام. فمثلا بعد ربع ساعة ان لم يآكل طفلك الغذاء ارفعي الطعام و حاولي تعويضه في الوجبة الخفيفة التي بين الغذاء و العشاء او في وجبة العشاء

٥. لا للتليفزيون اثناء الطعام فذلك ينمي عادات غذائية غير صحية لدى الطفل

٦. حاولي تقديم الوجبات في هيئة اطعمة يستطيع الطفل ان يآكلها بنفسه فلا يضطر الى الاعتماد عليكي و حتى تقللي الصدامات بينك و بين طفلك. مثلا وجبة الغذاء ممكن ان تكون عبارة عن قطع دجاج صغيرة و معكرونة اقلام يستطيع الطفل اكلها اما بيده او باستخدام الشوكة و قطع فاصوليا كبيرة. 

٧. اعلمي جيدا ان الاطفال ابتدآ من سن السنتين تقل شهيتهم بشكل ملحوظ و كبير جدا فلا داعي من الاصرار على اطعامهم كميات كبيرة من الطعام خلال كل وجبة

٨. ان كان طفلك لا يحب طعام معين فهذا لا يعني ان هذا الوضع سيستمر طوال العمر. لا تيآسي ابدا من تقديم نفس صنف الطعام مرارا لطفلك و لكن على فترات زمنية متباعدة و في اشكال طهي و تقديم مختلفة ان امكن

٩. الطفل في هذه المرحلة العمرية معروف بالعناد و قد يصر الطفل على رفض صنف معين من الطعام حتى دون تذوقه ان احس منك اصرار على اطعامه هذا الصنف على وجه الخصوص

١٠. احرصي على تناول بعض الوجبات في وجود طفلك و على التجمع الاسري حول مائدة الطعام من وقت لاخر فذلك يزيد من فضول الطفل في تذوق الاطعمة المختلفة و من رغبته في تناول الطعام محاكاة لمن حوله

١١. الطفل في هذه المرحلة العمرية روتيني جدا و عادة ما لا يحب تجربة الاطعمة الجديدة و الغير مآلوفة. عادة ما يميل الطفل اكثر لتناول نفس الطعام كل يوم. لذلك احرصي على تقديم الاطعمة المفيدة و المغذية مبكرا حتى يعتاد الطفل على ذلك حين يبلغ عامه الثاني. 

مهام الحياة اليومية: النظافة الشخصية

جزء كبير من نظام المونتسوري يتركز على تعليم الطفل كيفية الاهتمام بنفسه حتى ينمي لدى الطفل الاحساس بالمسئولية و يجعله يشعر انه مثله مثل بقية افراد العائلة له دور و مهام و واجبات و ليس مجرد دمية يحملها الكبار من مكان لآخر. و اعتقد ان هذا الاسلوب في تربية الاطفال هو من اكثر الاشياء التي اثارت اهتمامي بنظام المونتسوري فانا بطبعي احب الروتين و النظام و مقتنعة تماما بآن الطفل الذي يشعر بانه عليه واجبات و مسئوليات من الصغر يصبح عضوا منتجا و مسئولا في المجتمع. غير ان اعطاء الطفل الحرية في بعض امور حياته بما لا يضر به يقلل كثيرا من حالات الاصطدام بينه و بين ابويه نتيجة رغبته في تقليدهم و في استكشاف الحياة من حوله. الطفل منذ نعومة اظافره يهوى تقليد الكبار و احيانا كثيرة ما يعرضه ذلك للوقوع في مخاطر لا حصر لها. فهذه طفلة تجرح اصبعها الصغير محاولة استخدام السكين مثل امها في المطبخ و هذا طفل يكسر طبقا محاولا المساعدة في اعداد السفرة...الخ. هذه الآمثلة لا تعني ابدا ان الطفل عاجز او لا يستطيع بالقيام بكثير من المهام التي نقوم نحن الكبار بها بشكل يومي و لكن السر هنا هو اعطائهم التعليمات المناسبة و الثقة اللازمة للقيام بهذه المهام بآقل خسائر ممكنة. نعم ستكون هناك بعض الخسائر و بعض الفوضى من وقت لآخر و لكن دورنا نحن الاباء و الامهات استيعاب ذلك و غض النظر عن بعض هذه الاخطاء حتى لا يفقد الطفل الثقة في نفسه و يكف عن المحاولة

من اهم الجوانب او الانشطة التي يركز عليها منهج المونتسوري هي انشطة الحياة اليومية التي يستطيع الطفل من خلالها الاعتناء بنفسه فيما يخص النظافة الشخصية، تحضير وجبات طعام سهلة، المساعدة في اعمال البيت البسيطة، نظافة المكان بعد استعماله، تنظيم آلعابه... الخ. و لآن نظام المونتسوري يرفض التعليم المنهجي كدراسة الحروف و الارقام و غيرها عن طريق الحفظ و التسميع فآنشطة الحياة اليومية تعتبر من اول و اهم الدروس المناسبة للاطفال ابتداء من عمر السنتين او اصغر بقليل.  تابعوني و ساحاول عرض مجموعة من الانشطة التي اقوم بها مع بناتي في شكل دروس يومية او اسبوعية تستطيعين انت ايضا القيام بها مع اطفالك في البيت

الدرس الاول الذي بدآته مع بناتي منذ اسابيغ قليلة و لازلنا نتمرن عليه هو النظافة الشخصية اليومية ضمن روتين القيان من النوم في الصباح او قبل الذهاب للنوم ليلا. و للآمانة احيانا كثيرة نظرا لضيق الوقت لا نستطيع القيان بهذا الروتين التفصيل كل ليلة و لكننا نحاول قدر المستطاع. السر في هذا الروتين هو تقسيم المهام لاجزاء و تعليم الاطفال كل جزء على حدى و عدم الانتقال للجزء الذي يليه قبل التآكد من ان الطفل يستطيع القيام بالاجزاء السابقة على اكمل وجه

لقد قسمت روتين الصباح في النظافة الشخصية كالتالي (الغرض هنا ان يتعلم الطفل كيفية القيام بكل هذه الاعمال بنفسه):

١. تخلع بناتي ملابس النوم 

٢. يقوما بوضع ملابس اخرى غير ملابس النوم (لازالت عملية اللبس تحت التمرين خاصة لبس الجوارب و القمصان (التيشيرت)

٣. تتبادل البنات الادوار في غسيل الوجه، و اليدين، و الاسنان في الحمام

حتى يستطيع الطفل بمهام النظافة الشخصية في الحمام دون الاعتماد على من هم اكبر منه يجب ان تتوافر لديه الادوات التي تناسب حجمه الصغير و طوله. هناك اختياران لتحقيق ذلك.

الاول: هو وضع كرسي صغير امام حوض الحمام حتى يتمكن الطفل من الصعود عليه و غسل يديه و وجهه (لكني بالتجربة وجدت ان بناتي يجدن صعوبة في الوصول للصنبور و فتح المياه و ايضا بعد انتهائهم من غسيل ايديهم تكونا قي بللن ملابسهن و الارض (

الثاني: (و هو ما قمت به الان و اجده حلا ناجحا جدا) هو توفير مائدة صغيرة تناسب طول الاطفال و نضع عليها كل ما يحتاجوه للقيام بهذه المهام

هذه هي صور الحمام الان في بيتي (مع مراعاة ان حجم الحمام لدي صغير و لكني اصررت على ان تجد بناتي مساحة لهم يشعروا فيها بالحرية و الاستقلال) و هذا ما ترونه في الصور بالتفصيل

١. صندوق بلاستيك كبير: يقوم مقام القاعدة لكل ما سيوضع فوقه و فضلت استخدامه عن مائدة خشبية لسهولة تنظيفه، و لآستخدمه كمكان لتخزين المناشف و لتحمله للمياة

٢. طبق بلاستيك عميق: يكون بمثابة الحوض. فاقوم بملئ كوب او دلو صغير بالماء و اعطيه لبنتي لتسكبه في الطبق و تغسل منه يديها

٣. كوب به فرش الاسنان

.٤. كوب للغرغرة: لكن خطوة الغرغرة بآت بفشل ذريع :) حيث ان بناتي دتئما يقوما ببلع الماء بدلا من الغرغرة به و التخلص منه :) لازلنا لا نتسخدم معجون اسنان بعد بناء على تعليمات الطبيب

٥. طبق به صابونة صلبة: و هي افضل بكثير من الصابون السائل لانها تنمي عند الاطفال القدرة على التحكم في عضلات ايديهم حتى لا تنزلق الصابونة كما انها مسلية جدا لهم بملمسها الناعم

٦. مرآة صغيرة: علقتها بمسمار مكتب على الحائط حتى نحاكي شكل الحوض الكبير

٧. منشفة صغيرة: الي جانب الحوض لتنشيف الايدي و الوجه

٨. اسفنجة صغيرة على جانب الحوض: كما ذكرت من قبل انه مهم جدا ان يتعلم الطفل تنظيف اي مكان بعد استخدامه و الاسفنجة هي اسهل طريقة لتنظيف السطح البلاستيك من قطرات المياة المتساقطة عليه

٩. فرشاة شعر: رغم ان بناتي لم يتعلما بعد تصفيف الشعر و لازلت اقوم بذلك لهم بنفسي

١٠.  زجاجة عطر: اجدها مفيدة جدا ايضا لتقوية عضلات اليد لدى الطفل حيث يقوم بفتح و غلق الزجاجة بنفسه وتنمية حاسة الشم و التمييز ايضا

بعد الانتهاء من غسل استخدام "الحوض" تقوم كل طفلة بسكب الطبق البلاستيك في البانيو الذي يوجد مباشرة بجانبها و تجفيف السطح البلاستيك من قطرات الماء بالاسفنجة

افكار هذا الدرس مستوحاة من هذه المصادر

How To Raise an Amazing Child the Montessori Way

Montessori from the Start: The Child at Home, from Birth to Age Three

تابعوني ايضا على حساب الموقع على Pinterest لمزيد من الصور و الافكار

https://www.pinterest.com/0iudrrj2fhdxy4k/انشطة-الحياة-اليومية/

 

ماذا بعد رفض جميع اساليب العقاب المتعارف عليها؟

ان كنتي قد قرآتي مقالي السابق عن مساوئ العديد من اساليب العقاب المتعارف عليها فربما تبادر الي ذهنك هذا السؤال: "ماذا بعد ذلك؟ كيف يمكنني تربية طفلي و ارشاده الى الصواب و الحد من صراخه و بكائه دون عقاب؟". في هذا المقال ان شاء سيكون بداية الرد على كل هذه الاسئلة

اولا دعونا نتذكر سويا تعريف نوبات الغضب عند الاطفال في السنين الاولي من عمرهم: هي وسيلتهم الوحيدة او واحدة من اهم الوسائل التي يستعينوا بها في التعبير عن انفسهم و في معظم الحالات تكون نتيجة يآس من عدم قدرتهم على جذب انتباه الكبار او ايصال معلومة ما لهم. في بعض الاحيان ايضا تكون هذه النوبات نتيجة حاجة ما عضوية للطفل لم تلبى كاحساسه بالجوع او العطش او التعب او النعاس او الملل...الخ. اذا كان سبب البكاء هو لرغبة عضوية فيجب تلبية هذه الرغبة اولا للطفل في هدوء تام. فكري ايتها الآم في عدد المرات التي شعرتي فيها بالجوع او الارهاق و كنتي متقلبة المزاج ضيقة الصدر على من هم حولك؟ ما بالك بطفل صغير؟

هناك اجرائات احتياطية يمكنك من خلالها تفادي نوبات الغضب لدى طفلك التي تحدث نتيجة سبب عضوي او جسماني و منها التالي:

١. احرصي على اعطاء طفلك ثلاث وجبات مغذية يوميا بينها وجبتان صغيرتان. الثلاث وجبات هي بالطبع الفطار و الغذاء و العشاء. اما الوجبتان الصغيرتان قد يكونا عبارة عن مكسرات او زبيب او قطعة فاكهة او بسكوتة و عصير او كوب لبن و قطعة خبز صغيرة. قد تستغلى هذه الوجبات الصغيرة ايضا في تعويض نقص غذائي كالمكسارت لتعويض البروتين او قطعة جبن لتعويض نقص الكالسيوم و هكذا. و تذكري دائما المثل الانجليزي:

"A hungry man is an angry man"! او الانسان الجائع انسان غاضب

٢. احرصي على ان يشرب طفلك كميات مناسبة من الماء يوميا خاصة في فصل الصيف: فالعطش و الجفاف قد يسببان نوبات غضب، ارهاق، تغيرات مزاجية، كما قد يؤثران على التركيز و مستوى النشاط لدي الطفل (و لديكي ايضا)

 ٣ . احرصي علي ان ينام طفلك عدد ساعات كاف كل يوم: فالاطفال قبل سن المدرسة يحتاجون علي الاقل عشر ساعات نوم يوميا و قيلولة او اثنين خلال النهار حسب عمر الطفل. فطفل عمر ٦ شهور قد يحتاج الى اكثر من قيلولة خلال اليوم في حين ان طفل في عمر السنتين يحتاج الى قيلولة واحدة لمدة نصف ساعة على الاقل او وقت راحة قصير. راعي ايضا ان تكون مواعيد نوم طفلك و قيلولته ثابتة كل يوم و ان تحددي روتين سابق تقومين به قبل النوم حتى يتعود طفلك على هذا النظام و يكون اكثر تحكما في انفعلاته حيث انه يعلم جيدا كيف سيدور يومه و ماذا يتوقع

ايضا تعلمي ان تقرآي علامات التعب في وجه طفلك. فالطفل الرضيع غالبا ما يفرك عينيه و يتثائب كثيرا و يشيه بوجهه بعيدا عنك او بعيدا عن اي لعبه تريه اياها حين يشعر بالارهاق و التعب. اخر هذه العلامات هو البكاء المتواصل بلا سبب محدد لذلك حاولي جاهدة ان تتمي روتين النوم في نفس الميعاد كل ليلة قبل ان يدخل طفلك في نوبات البكاء و الصراخ المتواصل

٤. احرصي على شغل اوقات الفراغ لدى طفلك في انشطة مختلفة من وقت لاخر خلال اليوم فالملل من احد اسباب البكاء لدى الاطفال

٥. اعلمي جيدا ان الساعات الطويلة امام التلفاز و الوسائل المرئية تؤثر سلبا على مزاج طفلك و تركيزه و تجعله عصبي

هذه بعض الاسباب العضوية التي لو حرصتي على مراعتها و اخذها في الاعتبار مع طفلك قد تستطيعين القضاء على جزء كبير من اسباب بكاء طفلك و بالتالي عصبيتك و توترك خلال اليوم. في المقال القادم بآذن الله سنتحدث عن الاسباب الاخرى الغير عضوية او النفسية التي تؤدي لنوبات الغضب عند الاطفال و كيف يمكن معالجتها. لقرآة المقال الاول في هذه السلسلة برجاء الذهاب لهذا الرابط:

http://www.anawbanatee.com/posts/2015/4/1/tantrums1

كيف يمكن تطبيق جدول الاعمال اليومية لاعمار مختلفة؟

الغرض من االجدول كما اوضحت في المقال السابق هو ان يتعود الطفل على نظام ثابت يقوم به كل يوم ، لما يترتب على ذلك الكثير من الفوائد و من اهمها تقدير قيمة الوقت. برجاء الرجوع الى المقال الخاص بهذا الموضوع لمعرفة بقية الفوائد. اما الجدول الذي وضعته هو مجرد مثال يتماشى مع اسلوب حياتي انا و اسرتي و هذا لا يعني ابدا انه يجب ان يتماشى مع كل الاسر و كل الاطفال. هناك بعض الثوابت فقط التي يجب مراعتها عند تحديد جدول يومي لاطفالك:

١. مواعيد الاستيقاظ و النوم ثابتة ولا تتغير و لا تنسوا  "البركة في البكور" صدق رسول الله صلى الله عليه و سلم. ايضآ يراعي ان الاطفال منذ الولادة و حتى سن الاربع - خمس سنوات يجب ان يخصلوا على قيلولة خلال النهار و لو لنصف ساعة. و امن كان طفلك من النوع الذي يرفض النوم خلال النهار ممكن ان تكتفي فقط بوقت الراحة "يدخل طفلك حجرته، تهدئ الاضائة او تغلق الشبابيك، تضع موسيقى اطفال هادئة او قرآن بصوت خافت (اختياري) و تعود طفلك ان هذا الوقت للاسترخاء او قرآة كتاب و قد تجلس معه في الغرفة و تقرآ كتاب ان رفض.

٢. مواعيد محددة و ثابتة كل يوم لثلاث وجبات غذائية و وجبة او اثنين صغيرتين جدا كقطعة فاكهة او حفنة مكسرات او كوب لبن و بسكويتة

 ٣. روتين خاص للصلاة  و ان تصلي امام طفلك اكبر عدد من الصلوات ممكن و قرآة ورد ثابت من القرآن كل يوم. ان كنت تحفظ ايات قليلة من القرآن يوميا حاول حفظها امام طفلك و هو يلعب. ستفاجآ بعد ايام او اسابيع انه حفظ معك

٤. وقت محدد كل يوم للقرآة معا و لو كتاب واحد صغير

٥. نشاط فني او جسماني صغير يوميا كنوع من التغيير و ليقرب بين الطفل و الدته او والده حيث يمكن استغلال هذا الوقت في الكلام عن يوم الطفل و الاحداث التي دارت فيه دون ان يشعر الطفل انه في حالة استجواب. تالنشاط قد يكون صغير كتلوين صورة او لعب بالصلصال

٦. مهام ثابتة للطفل يتعلم فيها الاعتماد على نفسه و ان له دور في البيت يقدر و يحترم 

٧. روتين ثابت للاستيقاظ و النوم يتناسب مع ظروف الاسرة و يعود الطفل على الفرق بين الليل و النهار و يسهل دخوله حجرته للنوم ون عناء و رفض و صراخ و بكاء (سنتكلم لاحقا بتفاصيل اكثر عن هذا الروتين(

بعد مراعاة هذه النقاط يمكنك البدء في تخطيط الجدول المناسب لطفلك بما يتماشى مع اسلوب حياتك و المرحلة العمرية لطفلك 

رابط مقال الجدول اليومي:

http://www.anawbanatee.com/posts/2015/3/26/awb1

http://www.anawbanatee.com/posts/2015/3/30/awb2

كيف نتعامل مع نوبات الغضب عند الاطفال؟

خلال الاسبوع الماضي كنت اتابع بدقة كثير من التدوينات و المقالات الخاصة بالتعامل مع نوبات الغضب للاطفال و قد لفت نظر احدى النقاشات القائمة بين مجموعة من الامهات على احدي مواقع التواصل الاجتماعي و قد استفدت كثيرا من هذا النقاش و قررت ان اترجم جزء منه و اضيف اليه بعض المعلومات الآخري التي تعلمتها من قرئات اخرى الى جانب خبراتي و تجاربي الشخصية مع بناتي

اولا احب ان ابدا بتعريف جميل وصفت به احد هذه الامهات معنى نوبات الغضب لدى الاطفال حيث قالت ان هذه النوبات هي عبارة عن تجمع عدد من المشاعر القوية لدى الطفل (كمشاعر الحزن او الفرح) والتي لا يدري بسبب سنه الصغير كيف يتعامل معها فيخرجها في شكل بكاء شديد. احيانا هذا البكاء يعبر عن يآس هذا الطفل من محاولاته المستمرة و الغير الناجحة في ايصال معلومة ما لنا نحن الكبار و لكننا نعجز عن فهمه. كما اوضحت انه من المهم جدا لنا كآمهات و اباء ان ندرك ان نوبات الغضب و البكاء الشديد هي وسيلة الطفل الوحيدة في التعبير عن مشاعره و انه لا مفر منها. فلا جدوى من ان نحلم و نتمنى طفل هادئ دون دموع و صراخ و لكن دورنا كمعلمين و اولياء امور لهذا الطفل ان نعطي الطفل الاسلحة اللازمة للتعبير عن مشاعره بآن نعلمه التصرفات المقبولة و الغير المقبولة في المجتمع و ان نوفر له اساليب اخرى للتعبير عن احباطه او غضبه او حزنه و ان نفتح دائما باب للحوار مع الطفل يستطيع من خلاله التعبير لنا عن كل ما يدور في ذهنه. برجاء ملاحظة ان التعبير السليم عن المشاعر و الافكار و استخدام اللغة بشكلها الصحيح للقيام بهذه المهمة من احد الجوانب الاربعة التي يركز على تنميتها نظام المونتسوري لدى الطفل

كنت من اسبوع نشرت صورة على صفحة "انا و بناتي" على موقع الفيس بوك توضح ان معظم الاساليب التي اعتدناها في التربية لعقاب الطفل هي اساليب خاطئة وقد اثارت هذه الصورة استياء البعض و حيرة البعض الاخر. فبحثت قليلا لاستكشاف ما هو الخطآ الكامن في كل واحدة من هذه الاساليب. فيجب قبل ان نبدآ فكر جديد ان نهدم الفكر الخاطئ الذي يسبقه حتى نبدآ بداية سليمة. و الآن فلننظر الى تلك الاساليب و عيوبها:

١. ارسال الطفل للجلوس بمفرده في حجرته او اي من هذه المسميات

time out, naughty corner...etc.

خطورة هذه المسميات انها ترسل للطفل رسالة بآن حب امه حب مشروط اي انها تحبه فقط حين يقوم بما يرضيها و هذا طبعا كلام غير صحيح. هذا غير ان الطفل في السن الصغير لا يستطيع فهم لماذا يجلس في هذا المكان وحده خاصة و ان كانت الآم تقوم بعزل هذا الطفل في حجرة مغلقة. و الاهم من ذلك ان الام عندما تلجآ لهذا الاسلوب تكون في معظم الاحيان غاضبة مما يزيد الطفل عنادا و اصرارا حتى بعد الجلوس بمفرده في مكان العقاب

برجاء ملاحظة ان هناك بعض الاطفال يفضلون الجلوس وحدهم اثناء نوبات الغضب وليس هناك عيبا في ذلك ان كنتي تعلمي ذلك عن طفلك. مثلا لاحظت ان احدى بناتي دائما وجودي بجابها يزيد من مشاعرها و بكائها و لذلك نجلس معا في ركن "عيوطة" و لكني اتظاهر بقرآة كتاب او الانشغال عنها في حين ان اختها تقل ثورتها حين احتضنها. اذن فالعزلة الصحية لا تكون بدافع العقاب و لا عن طريق عزل الطفل تماما باستخدام الابواب او الاسوار و ان كان الطفل يفضل الجلوس في غرفته (باختياره) فيجب ان يعلم جيدا انه باستطاعته الخروج منها بعد ان يهدآ. مثال اخر: عندما كانت احدى بناتي في الشهور الاولى من عمرها كانت تصيبها نوبات بكاء هيستيري حين وجود اغراب فكنت اضعها في غرفتها و اطمئنها و اتركها قليلا مع موسيقى هادئة و لعبة او كتاب، بعد دقائق كانت تهدآ تماما و تبدآ في الضحك او الغناء و هنا كنت اذهب مرة اخرى و التقطها لتجلس معنا و كآن شئ لم يكن. فانا لا اعاقبها و لكن اعطيها فرصة للتحكم في مشاعرها و لادراك حقيقة انه هناك افراد اخرين بالمنزل غير ماما و بابا و اختها. اذن الخلاصة هنا انه هناك فرق كبير بين اعطاء الطفل مساحة لاستدراك مشاعره و بين تجاهله و ازدرائه

٢. الصراخ: خطآ شائع نقع فيه جميعا (و انا اولكم) هو الصراخ في وجه الطفل حين يتصرف تصرف خاطئ و خاصة حين يبدآ موجة الغضب و البكاء. و لكن السؤال هنا: لماذا نلجآ للصراخ؟ الاجابة طبعا لآن صراخ و بكاء طفل الى جانبنا يجعلنا نشعر بضغط شديد و عدم القدرة على تحكم في مشاعرنا الغاضبة! اذن ان كانت هذه ردة فعلنا كآباء و امهات ناضجين لماذا نتوقع عكس ذلك من صغارنا؟ لماذا نتوقع ان صراخنا سيحل المشكلة او سيمنعهم من البكاء؟ 

النقطة الاخرى التي يجب ان نتنبه لها هي ان الطفل مجرد ورقة بيضاء لا يعرف حتى التعبير عن مشاعره و نحن الكبار نعطيه تلك الادوات اللازمة للتحكم فيها و التعبير عنها. فآن كانت رد فعلنا لآي موقف يثير التوتر هو الصراخ فآذن نحن نعلم الطفل ان الصراخ هو الحل!

هناك احدى الامهات اشارت انها تستخدم صوت اقرب لصوت الوشوشة اثناء بكاء ابنائها و وجدت لهذا الاسلوب صدى فعلى حد قولها الصوت الهادئ يثير الفضول حيث يحاول الطفل ان يخفض من صوته حتى يسمع ما تقوله امه. للآمانة العلمية انا جربت هذه الطريقة مرتين فقط مع بناتي خلال الامس و لاحظت انها ناجحة في الاوقات التي تكون فيها احدى بناتي لديها طاقة مفرطة في وقت نحتاج فيه للهدوء كقبل النوم او قبل البدئ في نشاط يحتاج للتركيز.

٣. التهديد: و هذا يعد من اخطر انواع العقاب اللتي ممكن ان نلجآ لها مع الطفل خاصة عندما تقول الام عبارات مثل: "لو مجتش معايا هسيبك هنا لوحدك" او "انا همشي و اسيبك عشان انت وحش" هذه العبارات لها اثر مباشر و اكيد في كسر الثقة لدى الطفل و انشاء مخاوف ليس لها حصر في خياله الواسع الكبير. فيتعلم ان لا يثق في من هم اكبر منه سنا و ان يتوهم الكثير من السناريوهات الغير منطقية خاصة عندما تقال هذه العبارات في مكان غريب عن الطفل كفي النادي او السوبر ماركت... الخ

الشئ بالشئ يذكر بما اننا بصدد الحديث عن زرع الثقة في الطفل يجب ان تعلم الآم انه من اخطر الاخطاء على نفسية الطفل ان تتركه في مكان دون ان يعلم انها رحلت او ميعاد رجوعها. هناك كثيرا من الامهات يتركن اطفالهن في الحضانة مثلا و يرحلوا في وقت انشغال الطفل بلعبة ما فلا يجدها حين يلتفت الى اخر مكان كانت فيه. اذن الحل هو يجب علي الام دائما تهيئة الطفل و توقعاته (كما تحدثنا في مقال جدول المهام) بآنها ستتركه و ان هذا المكان امن و ما السلوك المتوقع منه اثناء غيابها

٤. الاستهزاء من الطفل: الجواب واضح من عنوانه و طبعا لا نحتاج ان نوضح الآثر النفسي المدمر على الطفل من فقده ثقته بنفسه و نتائج ذلك من انطواء و بعد عن المجتمع ...الخ

٥. العقاب البدني كالضرب: و هذا لما يؤديه هذا العقاب من تنمية العدوانية و الانطواء لدى الطفل. فقد اوضحت بعض الدراسات ان كثير من الاطفالالذين يتعرضون للضرب في سن الثلاثة اعوام يظهرون سلوك عدواني في سن الخامسة. فحتى ان كان الضرب ينجز المهمة او يوقف السلوك الخاطئ في وقته الا انه يزرع سلوكا اكثر خطآ في المستقبل فيعلم الطفل الالتزام فقط في وجودك او في وجود الكبار و بالتالي الكذب و فعل السلوكيات الخاطئة في غيابهم. كما ذكرت من قبل ان الطفل مرآة تصرفات الكبار فان استعنا بالضرب لوقف السلوك الخاطئ فآن الطفل يتعلم الاعتماد ايضا على الضرب مع اصدقائه و من هم من عمره. هذا و قد اوضحت الدراسات ايضا ان الضرب يؤثر على كيمياء المخ  فيجعل الطفل يصاب بالاكتئاب و التغير المزاجي و يقلل من قدرته العقلية. و اخيرا لنتذكر دائما نهي رسولنا الكريم عليه الصلاة و السلام الصفع على الوجه و هو للآسف خطآ تقع فيه بعض الامهات يدمر الجانب النفسي للطفل

و الان بعد ان اوضحت بعض مساوئ الاساليب التقليدية و المتعارف عليها في تقويم سلوك الاطفال و للتحكم في نوبات الغضب و البكاء لديهم تابعوني في الآيام المقبلة للتعرف على بعض الاساليب المفيدة للتعامل مع هذه الحالات

 ملحوظة هذه بعض المصادر التي استعنت بها و ليس كلها: في كتابة هذه السلسلة من الحلقات

http://www.huffingtonpost.com/2014/09/18/adrian-peterson-corporal-punishment-science_n_5831962.html

http://www.amazon.com/.../0553386697/ref=as_sl_pc_tf_til...

http://www.handinhandparenting.org/.../helping-children.../

http://montessorionabudgetinc.blogspot.com/.../challengin...

http://montessorionabudgetinc.blogspot.com/.../child...

http://www.huffingtonpost.com/2012/01/19/dehydration-mood-worse-women_n_1216762.html

How to Raise an Amazing Child the Montessori Way

Montessori from the Start: The Child at Home, from Birth to Age Three

انشطة الاطفال من سن ٣-٦ شهور #الحلقة الرابعة

بالنسبة للآلعاب و الانشطة المناسبة للاطفال من سن ٣-٦ شهور دي هتكون اخر حلقة النهاردة ان شاء الله. تابعونا عشان هنبدآ سلسلة الالعاب لسن ٦ شهور الاسبوع اللي جي بآذن الله. طبعا كل الافكار دي على سبيل المثال و ليس الحصر يعني ممكن تبتكري انتي افكار من عندك او تدوري عالنت و الافكار ملهاش اول من اخر. بما اننا كنا بنتكلم على اهمية الرياضة للاطفال خلونا نبدآ بتمرين رياضي مهم جدا للاطفال في السن ده:

٨. النوم على البطن: مهم جدا انك تعودي طفلك انه ينام على بطنه من نص ساعة لساعة اول ما يتم التلات شهور لآن ده بيكون زي تمرين الضغط بتاع الكبار... بيقوي العضلات و يساعد الطفل انه يحاول يتقلب و يقوي عضلات رقبته. اهم حاجة طبعا انك لازم تكوني جنب طفلك و هو في الوضع ده و انك متسيبهوش ابدا ينعس و هو على بطنه عشان خطر الاختناق الله لا يقدر. احيانا ممكن تكون عضلات الطفل ضعيفة او لسة مبيقدرش يتقلب فممكن يختنق لو نام على وشه و معرفش يتنفس. عشان تشجعي طفلك انه يرفع راسه و يتقلب ممكن تحطي جنبه اي لعبة هو بيحبها و يا سلام لو بتنور او بتعمل صوت يلفت انتباهه. كمان يا ريت تنامي جنب طفلك و تخلي راسك في مستوى راسه الاطفال في السن ده بتحب تدرس تعبيرات الوشوش جدا. 

٩. موضوع تعبيرات الوشوش ده ياخدنا لنشاط تاني شائع في نظام المونسوري انك تحطي مراية جنب طفلك لآنه بيحب جدا انه يتابع حركات جسمه و يشوف وشه فيها. بالنسبالي موضوع المراية دي اللي شجع بنتي انها ترفع راسها و تبص.

١٠. شجعي المهارت الحسية و حاسة اللمس و التعرف عالآشياء من خلال اللمس بآنك تحضريله علبة او صينية فيه حاجات امنة من اللي موجودة في البيت بس ياريت تكون الحاجات دي مختلفة في الملمس و الصوت و الشكل بحيث انك تنشطي كل حواس الطفل. امثلة للي ممكن تحطيه في العلبة: مكعبات، كور، فرشاة شعر صغيرة، كوباية بلاستيك، مشبك، حيوانات بلاستيك، قطعة ليفة صغيرة، شرايط قماش صغيرة، جرس... الخ.

الفكرة دي علمتهالي مامتي اول ما ابتديت اعلم البنات الاكل. كتير من الناس بيلهوا الاطفال بالتليفزيون عشان يعودوهم عالآكل لكن غير الاضرار الصحية للتليفزيون خاصة للاطفال تحت سن التلات سنين الا ان كمان البيبي بيسرح في التليفزيون و بينسى يمضغ. جربي تطفي التليفزيون و تديله في ايده اي حاجة من حاجتك بيمسكها لآول مرة و استمتعي بكم الانبهار اللي هتشوفيه في عيون البيبي. اديله علبة مكياج و سيبيه يلعب بيها لحد ما يكتشف ازاي يفتحها او طبق بلاستيك عميق و مضرب سيلكون و علميه يقلب او ازازة فاضية حطي فيها شوية رز و خليه يرجها او عصارة ليمون و سيبيه يفتح و يقفل فيها... او اي فكرة تانية تيجي في بالك. متنسيش ان الحاجات اللي انتي متعودة عليها في حياتك اليومية جديدة لانج في ذاكرة طفلك. و دايما افتكري ضرورة اللغة و انك تكلمي و توصفي كل حاجة بتعملوها.

١١. صلصال آمن للآكل: قوي قلبك و افرشي مفرش بلاستيك عالآرض و استعدي للغوصة. قلبي كوباية دقيق رز ناعم مع ٣ معالق كبيرة زيت جوز هند سايح و خلي الخليط يبرد. طبعا الصلصال ده للطفل بعد سن الاربع شهور يعني بيعرف يقعد و يمسك ضهره عشان يقدر يلعب بالصلصال. (يفضل تستشيري طبيبك لو خايفة يكون فيه حساسية من جوز الهند)

١٢. اكياس الالوان: قلبي كام معلقة زبادي بنقطة آلوان طعام و حطيهم في كيس و اقفلي عليهم كويس بحيث يكون فيه مساحة للزبادي انه يتحرك. ادي الكيس للطفلك و سيبيه يلعب بالكيس على ترابيزة الاكل هيشده اوي منظر الزبادي و هو بيتحرك في الكيس. زيادة امان ممكن تلزقي الكيس بلزق زي بتاع الدهان من كل الجوانب عالترابيزة بحيث ان البيبي ميقدرش يشيله من مكانه و يحطه في بقه. لو وصلتي لمرحلة انه امان للطفل انه ياكل زبادي ممكن تحطي معلقتين تلاتة من الزبادي الي مضافلة نقطة الوان طعام على ترابيزة الكل بتاعة البيبي او اي سطح نضيف و سيبيه يلون و يشخبط و ياكل براحته. 

يا رب تكون الانشطة عجبتكم و ياريت تقولولي لو عملتوا حاجة منها مع اطفالكم و كان رد فعلهم ايه؟

انشطة الاطفال من سن ٣-٦ شهور #الحلقة الثالثة

لسة بنتكلم عن الآطفال من سن ٣-٦ شهور. لاحظت ان فيه ناس كتير اعجبت بالتمرينات الجسدية بتاعة الاطفال في السن ده لفوائدها اللي اتكلمنا عليها فقلت نتكلم شوية زيادة عليها النهاردة. لما كان بناتي عمرهم ٥ شهور حضرت بيهم مجموعة حصص للتدريبات الرياضية اللي طبعا تنفع طبيعة جسمهم الصغير و اللي لاحظت انها حسنت نومهم بشكل ملحوظ. ابتديت اتواصل مع مدربة البرنامج ده و دلتني على مجموعة فيديوهات و كتب فادتني جدا في اني اقوم بالتمرينات دي بنفسي مع بناتي في البيت. النهاردة حبة اشارككم معايا ببعض من المصادر دي اللي انا متآكدة انكم هتحبوها جدا لما تجربوها مع اطفالكم. 

الكتاب اللي هتلاقوه في البوست اللي جي ده آلفته مدربة يوجا متخصصة في مساج و تدليك الاطفال الرضع اسمها Helen Garabedien. و هي نجحت في انها تصمم اكتر من ٧٠ كورس خاص برياضة الاطفال في مختلف الاعمار لآيمانها بدور الرياضة و اهميتها منذ الصغر. في وجهة نظرها لعب اليوجا مع الاطفال الرضع بتطود العلاقة بين الآم و طفلها و تسهل الهضم و تحسن النوم. هي ببساطة بتقسم اليوجا لعدة اوضاع ليها تآثير ايجابي معين على كل جزء من اعضاء الجسم. اهم حاجة بآه لو طفلك اقل من ست شهور و لاقتيه بيعيط عمال على بطال من غير سبب الترينات دي كويسة جدا في تهدئة الاطفال. البرنامج اللي هي صممته اسمه Itsy Bitsy Yoga و هتلاقيله فيديوهات كتيرة جدا عاليوتيوب.

حاولي تخصصي عشر دقايق لربع ساعة في اليوم تعملي شوية تمرينات مع طفلك و ياريت يكون بردو من روتين يومك مع طفلك عشر دقايق قراية قرآن سوا و قراية اي نوع من الكتب الخاصة بالاطفال. مفيش حاجة في الدنيا ممكن توطد علاقتك بطفلك و تقربه منك اكتر من وقت تقضيه معاه مخصص تماما له سواء في القراية او القرآن او الرياضة. و دايما فكري ان الوقت اللي بتقضيه النهاردة مع طفلك هو اللي هيتردلك بكرة 

https://www.youtube.com/watch?v=68z8oTAxjQY

https://www.youtube.com/watch?v=gFYKUHzbd74

https://www.youtube.com/watch?v=9i4HSQAP9_4

ده الكتاب اللي حكيت عنه  الخاص بتمرينات اليوجا للآطفال الرضع. الكتاب فيه مجموعة صور كتيرة جدا بتوضح كل وضع و كيفية تطبيقه مع الطفل.

http://amzn.to/1wSzMO9

فيه كمان نسخة تانية من الكتاب ده لروتين يومي مدته ٨ دقايق يوميا للآطفال من سن سنتين لخمسة

http://amzn.to/1vZzSZ3

انشطة الاطفال من سن ٣-٦ شهور # الحلقة الثانية

نكمل النهاردة بقية سلسلة الآلعاب و النشاطات الخاصة بالآطفال الرضع من سن ٣-٦ شهور. بما ان السن ده بيكون فيه بداية التسنين فخدي بالك في اختيارك كل آلعاب طفلك لحد سن السنة ان اي لعبة لازم تكون امان من ناحية النضافة و ان ميكونش فيها اي اجزاء حادة او مكسورة لآن طبعا اي لعبة هيحطها البيبي في بقه عالطول. 

٤. آلعاب سمعية: زي الجرس و الشخشيخة اللي من اهم مزاياهم انهم بيقوا حاسة السمع عند الاطفال و قدرتهم عالتمييز بين الاصوات. ممكن تجيبي مجموعة علب او تحطي فيها حاجات مختلفة زي بقول او رز او مكرونة و تحكمي غلقها كويس بمسدس الشمع و تسيبيها للبيبي يلعب بيهم و يكتشف الاصوات.

٥. العاب للتسنين: طبعا مفيش بيبي معندوش عضاضة   ودي مفيدة انها تقوي اللثة و تخفف من وجع التسنين. كمان من اشهر انواع العضاضات سلسة المفاتيح البلاستيك اللي فيها مجموعة مفاتيح من الوان مختلفة تساعدك انك تكلمي مع طفلك عن الالوان بعدين.

٦. انشطة لتقوية عضلات الجسم: ماما كانت دايما بتنصحني بشوية تمرينات خفيفة للبيبي و فعلا لما قريت عنها لاقيت ان التمرينات دي بتساعد الطفل عالتخلص من الغازات اللي بتمنعه من النوم و بتقوي عضلات جسمه و بتحضره لمهارات جسدية تانية هيحتاجها بعدين عشان يقدر يقف و يمشي و يمد ايده عشان يطول حاجة، ده غير ان التمرينات دي بتساعد البيبي عالاسترخاء و تجهزه لنوم احسن. عشان كدة خلي التمرينات دي من روتين ما قبل النوم بتاع البيبي كل ليلة. التمرينات البسيطة دي ممكن تكون زي انك تفردي و تتني رجليه من عند الركب جامد تجاه بطنه كمان امسك ايدين البيبي و افتحيها و اقفليها اكنه بيدي حضن و كذلك لرجليه. تمرين تاني انم تمسكي تاخدي الايد اليمين مع الرجل الشمال و تقفليهم و تفتحيهم مع بعض و تككري نفس الموضوع مع الرجل اليمين و الايد الشمال. اخر تمرين ده مفيد جدا للتنسيق العضلي بتاع البيبي و بتزود ادراكه باجزاء جسمه و قدراته. طبعا اكرر تاني متنسيش دور اللغة و انتي بتلعبي اي لعبة. كرري اسماء اجزاء الجسم كتير عشان تتحفظ. في كتير من الدول بيعملوا برامج مخصوصة اللتمرينات الرياضية للبيبهات من الولادة و حتى السنة الآولي زي اللي في الفيديوهات دي:

http://www.youtube.com/watch?v=-eMaDMjjRWg

(ده تمرين رياضة قريب جدا من لعبة الطيارة اللي اتكلمنا عليها الحلقة اللي فاتت)

http://www.youtube.com/watch?v=-dzEDB-WvZ8

انشطة الاطفال من سن ٣ - ٦ شهور #الحلقة الاولي

انشطة الاطفال من سن ٣ - ٦ شهور #الحلقة الاولي

لاحظت ان كتير بيسآل عن الالعاب و الآنشطة اللي ممكن نعملها مع الاطفال لكن سامحوني عشان بيكون صعب الرد على كل سؤال على حدا كل فترة هحط مرحلة عمرية معينة و الانشطة و الآلعاب اللي تنفع معاها و اللي من خبرتي الشخصية جابت نتيجة كويسة مع بناتي. الاسبوع ده هنتكلم عن البيبيهات من سن تلات شهور لقبل الست شهور عالطول عشان الست شهور دول عايزيين ليهم بوست لوحدهم  الاطفال في التلات شهور دول بيمروا بحوالي طفرتين او تلات طفرات نمو. يعني وزنهم بيزيد بشكل ملحوظ و مهاراتهم الحركية كمان بتتقدم جامد عشان كدة متستغربيش لو مرة واحدة البيبي بتاعك قعد لمدة كام يوم بيطلب لبن كتير جدا علي غير عادته و مزاجه مقريف و مبينامش عدل و بيصحى في عز الليل جعان و مش قادر يستنى ترضعيه او تحضريله البيبرونة 🍼 كمان حاسة السمع و الرؤية عند البيبي بتزيد اوي في الفترة دي فهتلاقيه ابتدى يتابعك بعنيه و انتي جية عليه من بعيد و ممكن يخاف من اي صوت مفاجئ بسسب التغيرات دي. بناء على الكلام ده البيبي دلوقتي مستعد انك تبدآي معاه شوية آلعاب و انشطة يومية تنمي قدراته. دي شوية اقتراحات يا رب تعجبكم و تابعموني عشان بكرة ان شاء الله هحط افكار تانية:

١. لعبة الطيارة : شيلي البيبي على دراعاتك على وشه و لفي بيه زي الطيارة. لفوا في نفس الاماكن في الشقة كل يوم و انتي بتلفي كرري اسامي الحاجة اللي انتي شايفاها: "شباك، باب، زرع، ترابيزة..." و هكذا. النشاط ده مهم لحاجات كتير: اولا انتي بتثري اللغة بتاعة طفلك بتكرار الكلمات الآساسية كل يوم (اوعي تقولي ده لسة صغير مش فاهم حاجة)، كمان الشيل بالطريقة دي مفيد انه يطلع الغازات من بطن البيبي اللي بتتعبه و يخليه يعيط كتير (ساعات كمان الشيلة دي  بتكون اسلوب كويس لتنييم البيبي)، كمان زي ما شرحت البيبي عينيه ابتدت تتعلم تتابع و ده هيفيده كتير في تنمية المتابعة و زيادة فضوله الوضع ده لتنييم البيبي لما يكون مريقف. ساعة اللعب شيلي البيبي كدة و ابعدية شوية عن جسمك بس و انتي لسة متحكمة فيه و العبوا لعبة الطيارة.

٢. الكتب📚: الكتب اللي معمولة من كاوتش او قماش حلوة جدا ان البيبي و هو بعيد عنك ينشغل فيها و ينمي مداركه و يعضعض براحته (مع بداية التسنين خدي بالك ان كل حاجة البيبي هيحاول يختبر صلاحيتها للآكل ) 
الكتب البلاستيك او الكاوتش دي بردو مسلية انك تديها للبيبي لما يتم سن الست شهور يلعب بيها و هو بيستحم

http://amzn.to/1EAgQdH

٣. اللعب المصنوعة من الاقمشة: و دي عن خبرة شخصية من اكتر الآلعاب اللي بيحبها البيبيهات في السن ده. اعملي علبة و حطي فيها مجموعة من الآقمشة المختلفة: (صوف، حرير، قطن، فرو...) و حطي البيبي على رجلك و افتحوا العلبة سوا و استكشفوها (بردو متنسيش تستخدمي اللغة متخليش ابدا الوقت اللي بتقضيه مع البيبي فيلم ابيض و اسود صامت) اللعبة دي بتنمي ادراك الطفل و قدراته الحسية. معظم آلعاب الفترة دي بتعتمد على حاسة اللمس عند البيبي. 

اللعبة دي (Taggies) عبارة عن قماشتين متخيطين على بعضهم من الناحيتين و متبطنين و قبل ما تقفليهم تخيطي فيه الشراشيب دي اللي هي عبادة عن شرايط قماش بردو. بناتي كانوا بيحبوا جدا اللعبة دي و كانت بتشغلهم بالساعات.

ممكن تشتريها من:
http://amzn.to/1C9XIn8

او تعمليها بنفسك:
http://backtoherroots.com/2014/09/11/tutorial-diy-lovey-tag-blanket/

http://www.youtube.com/watch?v=49v3ya_jfbg

لو عايزيين افكار تانية لسن التلات لما قبل الست شهور تابعوني خلال الآسبوع ده. برجاء فتح كل صورة على حدا لمعلومات اخرى.

الجدول اليومي للاطفال عمر سنتين

في مقالة اليوم هتكلم عن جدول الاعمال اليومي الي بحاول القيام به مع بناتي كل يوم. في بعض الامور الثابتة التي لا تتغير كل يوم و من ضمنها روتين الاستيقاظ من النوم في الصباح و روتين ما قبل النوم في الليل و مواعيد النوم سواء بالليل او بالقيلولة

١. روتين الاستيقاظ من النوم: الاستيقاظ من النوم االساعة ٧ صباحا يليه روتين النظافة الشخصية في الصباح (تغيير ملابس النوم - غسيل الوجه و اليدين - غسيل الاسنان - تمشيط الشعر - النونية او تغيير الحفاظة) عادة مدته حوالي ساعة و نصف (برجاء مراعاة فرق المدة بالنسبة لطفل واحد او طفل اكبر او اصغر في السن و اتاحة الفرصة للاطفال للقيام بمظم الاعمال بنفسهم) 

٢. الافطار: مدته حوالي ٢٠-٣٠ دقيقة و الغرض من ان يكون وقت الاكل عموما محدودا بزمن معين عشان يتعود الطفل على فكرة الالتزام بالمواعيد و اعطاء الطفل فرصة ان يهضم الوجبات استعدادا للوجبات التي تليها

٣. الصلاة و قرآة القرآن: لاحظت انك لو قمتي بتخصيص اية او اثنين من القرآن لحفظهم امام الطفل سيقوم هو الاخر بحفظها لا شعوريا في هذا السن الصغير. طبعا لا اغصب بناتي على الوقوف جانبي للصلاة لكن فقط اعطيهم طرحة الصلاة و ابدآ في صلاة الضحى فآحيانا يقفوا الى جانبي و احيانا اخرى يستمتعوا باللعب بالطرح او مشاهدتي. اثناء قرآة القرآن من الممكن اعطاء كل طفل اي كتاب باللغة العربية لان الطفل في هذا السن يحب تقليد الام فيتخيل نفسه يقرآ القرآن مثلها و يبدآ في ترديد الايات

٤. وقت الدرس: هناك مكان صغير نطلق عليه اسم "الفصل" حيث نجلس و نقوم بمراجعة بعض الحروف و الالوان و الاشكال التي درسناها من قبل ثم نبدآ بقرآة كتاب او اكثر كلهم حول موضوع واحد يختلف من يوم لآخر و احيانا يكون هناك وقت للعبة تنمي الحصيلة اللغوية للطفل

٥. اطلب من بناتي اللعب في حجرتهم و اعطيهم اي وجبة طعام صغيرة جدا كالحليب و بسكوتة او قطعة فاكهة ...الخ بينما اتفرغ لآعداد طعام الغذاء او العمل قليلا في المنزل

٦.  بعد ذلك تعتمد الانشطة على الوقت المتاح لدينا او النشاطات التي قمت باعدادها مسبقا او حالة الطقس او الحالة المزاجية لبناتي. فقد نقوم بتعلم مهارة جديدة او عمل فني صغير او التنزه خارج البيت

٧. هناك معاد ثابت للقيلولة كل يوم لا يتغير. حاليا هناك واحدة من بناتي ترفض نوم القيلولة فاصبحنا نسمي هذا الوقت وقت الهدوء فعليهم الدخول الى حجرتهم اما للنوم او للقيام بعمل هادئ كقرآة كتاب او اللعب بالبازل لمدة ساعة.

٨. وجبة الغذاء تكون بين الساعة ٤-٥ مساء و ايضا هناك فترة ثابتة بعدها لا يجب تقديم اي بدائل اخرى للاكل حتى لا يتعود الطفل على ترك الطعام طمعا في نوع اخر من الطعام كالحلوى او النشويات...الخ

٩. فترة تعتمد ايضا على اليوم و على كل العوامل السابق ذكرها و في الاغلب تكون فترة لعب حر لبناتي او مشاهدة التليفزيون لمدة ٣٠-٤٥ دقيقة او الاستحمام...الخ

١٠. روتين ما قبل النوم: العشاء (نفس الطريقة السابق ذكرها) بعدها بنلعب اي لعبة معتمدة على الحركة (عشان اضمن انهم فرغرا طاقتهم)بعد نهدي الانوار و نبدآ في التغيير للبس النوم و قرآة القصص الهادئة و قرآة الصور القصيرة من القرآن و ادعية النوم

 ملحوظة: طبعا في بداية كل نشاط او اكثر اطلب من بناتي ان يستخدموا لوحة الواجبات المصورة لتحديد المهام المراد القيام بها و عبد الانتهاء من النشاط من المهم جدا تعويد الاطفال على ترك المكان في نفس الصورة المرتبة الي وجدوا المكان عليها (سن سنتين لاربع سنوات يعتبر مرحلة حساسة عند الطفل لتعلم  النظافة و النظام وفقا لنظام المونتسوري) . روتين النوم و الاستيقاظ يمكن بدآه مع الطفل من الشهر الثالت من عمره حتى يتم تعويده على الفرق بين الليل و النهار و بالتالي تعويده على مواعيد نوم ثابتة ابتدآ من الشهر الرابع اوالسادس

بآذن الله هنتكلم بالتفصيل عن معظم هذه الانشطة في مقالات قادمة و كيفية القيام بها مع الطفل بما يوفر له الاعتماد على الذات و تعلم المهارات اليومية 

جدول الاعمال اليومية

بما اننا بقالنا فترة بنتكلم عن التحكم في الاعصاب عشان نتجنب العصبية عالاطفال لاقيت ان من اكتر الطرق اللي بتخلي بناتي هادية هي انهم يكونوا عارفين مقدما ايه الخطوة الجية. بمعنى اني مفاجآهمش اننا يلا هنخرج او يلا هنام او يلا هناكل... الخ. لآن الطفل لما بيعرف الخطوة الجية اللي هو مقدم عليها بيعرف ايه المتوقع منه من ناحية السلوك و ايه المطلوب منه. اكتر حاجة ممكن تخلي الطفل عصبي او غير متعاون او مشاغب (كل طفل حسب شخصيته)انه يتحط في موقف مش عارف هو ايه او ايه المطلوب منه انه يعمله. عشان كدة النهاردة هعرض عليكم فكرة جدول الاعمال المصور اللي بعمله مع بناتي كل يوم خصوصا الصبح اول ما يقوموا من النوم و بليل قبل النوم٠ح=ج. الفكرة دي ليها ست مزايا

اولا: بتخلي الطفل اهدى و اكتر تعاون عشان بيكون عارف يومه ماشي ازاي و ايه المتوقع منه و بالتالي الطفل بيقدم احسن ما عنده في كل خطوة بيقوم بيها

ثانيا: الاطفال بيجدوا سعادة في انهم يشيلوا و يحطوا الصور عالسبورة او التلاجة بنفسهم. ده غير ان الموضوع ده بيشبع عندهم الرغبة في التحكم و بيحسوا ان هم اللي بيخططوا يومهم بنفسهم

ثالثا: ان الفكرة دي بتعلم الاطفال النظام و قيمة الوقت و اهمية تخطيط اليوم و ان وقتنا مش ماشي كدة و خلاص بلا قيمة

رابعا: ان النشاط ده بينمي الناحية اللغوية (و هي واحدة من اهم المهارات اللي بيركز عليها نظام المونتسوري) لانك و انتي بتعملي النشاط ده مع اولادك بتكرري كلمات كتيرة اكتر من مرة في اليوم و بتعرفيهم الكلمات المرتبطة بكل نشاط و بتساعديهم يوصفوا يومهم و ازاي بيقضوه

خامسا: ان الروتين شئ مهم جدا في تربية الاطفال و بنلاقي ان اكتر الاطفال نجاحا في دراستهم هم اللي عندهم روتين و نظام يومي لان تركيزهم بيكون في التعلم و الاكتشاف و وقت الفراغ و الملل بيكون محدود جدا

سادسا: وجود روتين يومي للنوم و الصحيان من سن صغير (حتى من الشهور الاولى للطفل) بيساعد الطفل عالتعرف على الفرق بين الليل و النهار و بيسهل كتير عملية النوم بليل و بالتالي الطفل بيقدر ياخد ساعات اكتر في النوم بليل و يقوم الصبح في نشاط اكتر

طبعا الفكرة دي ممكن تقدميها لطفلك اما من خلال الصور او الكلام حسب عمر طفلك و اللي يقدر يفهمه و بحيث يكون هو المتحكم في الانشطة من ناحية ان هو اللي يشيلها و يحطها. الاول بتبدآى اول اسبوع بان انتي اللي بتقولي لطفلك "تعالى نشوف هنعمل ايه" و بعدين تحطي من ٣-٤ انشطة و تشيليهم لما تخلصوهم و تحطوا اللي بعدهم و هكذا. لما الطفل يتعود عالروتين ده بعد كدة ممكن هو اللي يشيل و يحط الانشطة بنفسه حسب موعدها في جدوله

الصور اللي انا بستخدمها طبعتها و لونتها بنفسي و غلفتها. في ضهر كل صورة لزقت مغناطيس و بكدة ممكن نعلق الصور اما عالتلاجة او على اي صينية خبز. دي كانت صينية قديمة عندي غلفتها بورق جلاد و علقتها عالحيطة. الفكرة دي مناسبة ابتدآء من سن تقريبا ٢٠ شهر او ده الوقت اللي انا بدآتها فيه مع بناتي

ملحوظة: برجاء الضغط عالصورة حتى تظهر بقية الصور

.انتظروني و قريب ان شاء الله هنزل جدول الروتين اليومي بتاعنا

كام ساعة تليفزيون في اليوم؟

اكاديمية طب الاطفال الامريكية بتقول ان متوسط الساعات اللي بيقضيها الاطفال قدام التليفزيون ٤ ساعات يوميا في حبن ان الطفل قبل عمر الحضانة المفروض ميقضيش اكتر من ساعتين بس ـو بردو كدة كتير شوية). ده لآن تعرض الطفل بشكل مفرط للوسائل المرئية (تليفزيون، تليفون، فيديو جيم، تابلت) ممكن يآدي لتآخر في الكلام و امراض التخمة و اكتساب للسلوك العدواني. معلومة كمان سريعة في السنين الاولى من عمر الطفل استفادته اللغوية من التليفزيون محدودة جدا عشان لو بنريح ضميرنا و بنقول اهم قاعدين يتعلمولهم كلمتين، ده غير باّ الله اعلم اي الفاظ و مناظر هيتعرضلها الطفل لو انتي مش متابعة هو بيشوف ايه

آلعاب الاطفال من سنة ٦ شهور و حتى السنة #الحلقة ٤

زي ما قلنا قبل كدة الاطفال في السن ده بيهتموا جدا بآنهم يذاكروا تعبيرات وشوش الناس اللي حواليهم و خصوصا الآم. عشان كدة مهم جدا انكم تبدآوا تتكلموا عن التعبيرات دي و تمرني طفلك عليها. وري طفلك وشك و انتي بتضحكي و قولي (سعيدة او مبسوطة او ضحكة) و بعدين خليه يقلد الوش في المراية اللي انتي مسكاها. انا شخصيا اللي فاد بناتي جدا في تعلم تعبيرات الوجه هي مجموعة كتب جاتلهم هدية عن الناس و تعبيراتهم و كنا بنقراها كل  يوم لحد ما بعد فترة كانوا بيقدروا يقلدوا اي تعبير وجه نطلبه منهم. مجموعة الكتب دي حجمها .صغير و فيها كتب عن تعبيرات الوش و الاعداد و الاكل و حركات الجسم و اجزائه و غيرها او اي كتب او صور ممكن تلاقيها تعلم نفس المفاهيم بصور مبسطة و واقعية (متحاوليش تقدمي شخصيات خيالية كتير في السن ده عشان الطفل لسة مش هيستوعبها)

 

من الحاجات اللي بردو بتشد اهتمام الاطفال جدا من عمر العشر شهور تقريبا هي الحيوانات. يمكن لآنه عالم جديد و غريب عليهم مليان بالآشكال و الالوان و الاصوات و الاسماء و البيئات المختلفة و يمكن لآن الطفل بالفطرة بيحب الطبيعة و كل حاجة فيها. و الهوس بعالم الحيوانات ده هيستمر لسن كبير يمكن لبعد سن الحضانة. عشان كدة هتلاقي ان معظم و امتع قصص الاطفال اللي ابطالها حيوانات و ممكن من خلالها و مع الوقت تعلمي طفلك يعطف عالحيوانات و ازاي يتعامل معاها. حاولي تدوري عالكتب اللي فيها صورة الحيوان و ملمس مختلف لكل صورة زي صورة خروف و جزء من الصورة فرو عشان تنمي حاسة اللمس عند الطفل و يقدر يميز بين كل حيوان و التاني. و من خلال العالم الحيوان بردو ممكن تعلميه مفاهيم كتيرة جدا لا حصر لها. عموما في السن ده بس بتركزي على اصوات الحيوانات و اسمائها. بتبدآي ب٣-٤ حيوانات اساسية و مع الوقت تزودي. يفضل طبعا انك تبدآي .بالحيوانات اللي الطفل بيشوفها قدامه زي الكلب و القطة و العصفورة و العنكبوت... الخ بناتي كانوا بيحبوا المجسمات بتاعة الحيوانات خصوصا اللي فيها نفس الحيوان الام و الصغير بتاعها. بتلخبطي الحيوانات و تخلي الطفل يحط كل حيوان كبير مع الصغير بتاعه. و لما الطفل يكبر شوية عند سن ١٨ شهر ممكن تجيبي صور حيوانات من مجلات او كتب و تخلي الطفل يوصلها مع المجسم فبكدة الطفل بيتعلم ان رغم ان "القطة" اللي في الصورة لونها رمادي لكنها لسة "قطة" زي القطة "البيضا اللي في المجسم

لو بتحاولي تطبقي نظام المونتسوري مع طفلك في البيت يبقى مهم جدا انك تعلمي طفلك التآمل و الاستمتاع بالطبيعة. يعني لما تخرجي مع طفلك في الشارع متقوليش "بص القطة" و خلاص على كدة. الفتي نظر الطفل للونها و حجمها و صوتها و اسآليه لو سامع صوت القطر او العربيات و اطلبي منه يسكت عشان يسمع صوت الناس و الهوا و المية... و غيرها من الاصوات اللي في الشارع. يا ريت كمان لو تقدري تنظمي رحلة لحديقة الحيوان لطفل عند عمر السنة و قبلها بفترة تركزي جهودك في انكم تقروا قصص عن الحيوانات و تعرفوا اشكالها و اصواتها.

mom and baby with blossoms.jpg

اخر حاجة هنتكلم عليها النهاردة هي انك متنسيش ان الطفل في السن ده بيحب التكرار. متمليش لو طلب منك نفس اللعبة مرارا و تكرارا و متحاوليش تخبي منه اللعبة طول ما هو مبسوط بيها. كنت زمان بفتكر اني لما اشيل اللعبة اللي بناتي بيحبوها شوية ده هيخليهم ميزهقوش منها لكن بعد قرآة اكتر في نظام المونتسوري اكتشفت اني كدة بقطع رغبتهم في تعلم مفهوم و اكتساب مهارة معينة. ببساطة الطفل بيفضل يلعب باللعبة اللي بتشد انتباهه لحد ما يجيدها تماما. و افتكري ان كل طفل مختلف عن الاخر و مش لازم كلهم يحبوا نفس اللعب في نفس الوقت و لا يكتسبوا نفس الهارات في نفس  الوقت يعني الطفل اللي مشي بسرعة ممكن يتآخر في الكلام و العكس لان مخه و تركيزه كله بيكون في المهارة اللي بيحاول يتعلمها. معظم اطفال المرحلة دي بيحبوا الالعاب اللي بتعتمد على رد الفعل. يعني يحطوا الكرة تنزل في مكان معين او يدوسوا زرار حاجة تفتح و زرار يطلع صوت معين و هكذا. دي صور بعض الالعاب اللي بتعتمد على فكرة رد الفعل


العاب للاطفال سن ٦ شهور و حتى السنة #الحلقة٣)

غالبا الطفل بعد سن الست شهور بيحاول يستخدم ايده اكتر في انه يمسك اي حاجة قدامه، رغم انه لسة صعب عليه يتحكم في عضلات الابهام و السبابة مع بعض لكن ممكن تستغلي حركة ايديه دي في انك تمرنيه على مسك كوباية مية المحكمة الغلق بتاعة البيبيهات او ازازة اللبن بتاعته. انا عن نفسي بدآت مع بناتي اول ما تموا اربع شهور و فعلا بعدها بشهر او اتنين كانوا بيمسكوا الازازة (البزازة) لوحدهم. النصيحة دي   طبعا هتقدرها اوي اي ام لتؤام بتعاني كل يوم في مسك ازازتين لطفلين في نفس الوقت  😉

كمان هتلاحظي ان في بداية المرحلة دي الطفل بيحب جدا انه يخبط الآلعاب ببعضها او يرميها عالارض بالذات لو كان على سريره او على كرسي الآكل عشان كدة حاولي متبينيش استياء او زهق من الموضوع ده لان دي وسيلة الطفل في التعرف على العالم اللي حواليه. هو ابتدى يكون عنده ادراك اكتر ببعد و قرب المسافات و العمق و الارتفاع و نظرية ان لكل فعل رد فعل. عشان كدة هو بيحاول يفهم ايه اللي هيحصل لما يرمي اللعبة في الارض هتروح فين؟ و ايه اللي هيحصل لما هيخبط الالعاب في بعضها؟

بعد مرحلة الرمي دي و قرب نهاية سن ال٨ شهور بيكون عند الطفل تحكم احسن بكتير في عضلات ايديه و الابهام و السبابة اللي بتساعده يمسك الحاجة اللي في ايديه بحرص اكتر. حاولي في الفترة دي تقدمي للطفل خضار او فاكهة متقطعة في شكل مكعبات صغيرة و تسيبيها قدامه عشان يتعلم يمسك بصوابعه او مثلا قطعة بسكوت صغير او حلقات صغيرة  بس المهم انها تكون بتبوش في البق و ميكونش فيه منها خطر اختناق و الاكلات دي او finger food  بيعتمد فيها الطفل على صوابعه و تحكمه فيهم. متفكريش ان الموضوع سهل لآنك في الاول هتفاجئي ان طفلك بيقدر يمسك الاكل لكن مش بيقدر يتحكم في عضلاته و يسيبه او  بيكون لسة مش لاقي بقه فين من اصله😃

 

من اهم الحاجات بردو اللي بتشد اهتمام الاطفال جدا في السن ده هو الاشكال و الاحجام المختلفة للحاجات اللي بيشوفها كل يوم. (ملحوظة: لسة بدري جدا على ما طفلك يبدآ يتعرف عالآلوان و يميزها و يحفظ اسمائها، احيان كتير المرحلة دي بتتآخر لبعد عمر السنتين.) حاولي دايما تكلمي مع طفلك عن الاحجام (كبير، صغير) و عن الاشكال (مربع، مستطيل، مثلث...الخ)

 ممكن تجيبي صندوق تمليه حاجات من نفس الشكل و تغيري الشكل كل ١٠ ايام او اسبوع. مثلا رسمة لمثلث، و شريحة بيتزا او فطيرة لعبة، و علبة صغيرة مربعة بتتقفل و تتفتح، و مجسم لمربع تحطيهم كلهم مع بعض عشان تعرفي الطفل على شكل المربع و هكذا.

الفكرة اللي في الموقع ده كمان عجبتني. هي عبارة عن كتاب معمول من قماش الجوخ و ميزته  انه مش بس بيعلم الاطفال الاشكال بس لكن كمان بينمي الادراك عندهم عن طريق اللمس 

felt-shapes-book.jpg

 

فكرة تانية بيحبها الاطفال جدا هي لعب المتطابقات اللي هي بداية او تقديم للعبة البازل بعدين. خاصة ان الطفل بعد سن ال٨ شهور بيقدر يرفع الحاجة من الارض و يحطها في مكانها و بتتكون عنده بداية قدرات التفكير و التخطيط و حل المشاكل. ده غير ان العاب المتطابقات بتنمي قدرة الطفل عالتنسيق بين حركة ايديه و نظره (تآزر بصري و حسي) دي بعض الالعاب اللي استعملتها مع بناتي و حبوها او اللي ممكن ارشحها للسن ده

لعبة المتطابقات اللي ليها مقبض بتسهل عالطفل مسكها لحد ما يتعلم الغرض من اللعبة. او   . المتطاباقات بدون مقبض كمرحلة متقدمة . في نهاية السنة الآولي من عمر الطفل ممكن  تستهويه لعب مستواها اعلى زي صندوق الاشكال و اللي فيه منه اشكال كتيرة فطبعا بنبدآ باللعب الاسهل و مع الوقت ننتقل للآصعب

و طبعا لعبة المتطابقات من الالعاب اللي سهل تعمليها بآيديكي بآنك تجيبي اي مجسمات لآشكال مختلفة و تحطيها على ورقة بعدين تحدديها بقلم و ممكن تضيفيلها لزق كوتشي . . عشان المجسم يمسك في الرسمة الي بتتطابق معاه. ادخلي عالرابط ده لتفاصيل اكتر.

 

طبعا ممكن تقروا كتب و تسمعوا و تشوفوا سوا اغاني عن الاشكال (حاولي دايما وقت  التليفزيون يكون تعليمي و له علاقة بالمرحلة التعليمية اللي طفلك فيها) ده غير ان فيه تطبيقات  كتير على اجهزة المحمول و التابلت لتعليم الاشكال.

يا رب تكون الحلقة النهاردة عجبتكم و بكرة ان شاء الله هنكمل بآنشطة تانية بس لنهاية السنة الاولي (٩-١٢ شهر)

 

 

 

(العاب للاطفال عمر ٦ شهور و حتى السنة (الحلقة ٢

زي ما اتكلمنا الحلقة اللي فاتت ان الطفل في السن ده بيبدآ يبين تقدم كبير في تحكمه في عضلاته فتلاقي الطفل بيحاول يقعد لوحده او يحاول يسند عالكراسي عشان يقف. عشان كدة مجرد ما طفلك يتم الست شهور متنسيش تتآكدي ان البيت بتاعك فيه عوامل الامان اللي تناسب طفل في السن ده. يعني مثلا متنسيش تغطي مفاتيح الكهربا و تآمني اي اطراف حادة للاثاث عندك في البيت. يا ريت كمان لو تقدري تستغني شوية عن الفازات و الحاجات اللي ممكن تقع و تكسر في البيت. مهم جدا انك تعملي كدة لسببين: اولا عشان متآذيش طفلك لو حاجة اتكسرت، ثانيا عشان مش من العدل انك تلومي طفلك على حاجة كسرها هي اصلا مش من المفروض انها كانت تكون في متناول ايديه (المبدآ ده هيخليكي تتفادي خناقات كتييييير اوي قدام) كمان مهم انك توفري مساحة كبيرة لطفلك يحبي و يتحرك فيها براحته عشان يمرن عضلاته اللي هيحتاجها بعد كدة في القعاد و المشي

  النهاردة كمان هنركز على تنمية عضلات الطفل بآنك تحاولي تخصصي وقت لنومه على بطنه على الآقل ٣ ساعات يوميا. بس مهم جدا ان الطفل يكون صاحي و انك تكوني قدامه عشان ممكن ميعرفش يرفع نفسه بسهولة و بالتالي في خطر اختناق الله لا يقدر. حاولي تحطي قدام طفلك لعب تغريه انه يرفع راسه و هو في الوضع ده عشان يبص عليها 

maxresdefault.jpg

ممكن كمان تشجعي الطفل بآنك تحطيله مراية قدامه لآنه في السن ده بيستمتع جدا برؤية تعبيرات وشه او تنامي و ترفعي راسك في مستواه لآنه كمان بيحب يشوف تعبيرات وشك و بيتعلم منها ازاي يعبر

 ممكن بردو تحطي شوية مخدات رفيعة في المكان اللي الطفل بيلعب فيه عشان تشجعيه انه يسند عليهم او يحاول يحبي فوقهم و يتحرك اكتر او حتى يسند عليها شوية..لو بتستعملي مخدة رضاعة هتفيدك جدا في الوضع ده

الكلام ده مش معناه ان وضع النوم عالبطن هو بس اللي ممكن تستغليه في انك تنمي عضلات طفلك لكن ممكن كمان تفيدي طفلك في الاوقات اللي بتكوني مش معاه في نفس الغرفة و بيكون نايم على ضهره. عادة الطفل بعد سن ٣ شهور بيقدر يشوف الحاجات على مسافة متر منه و يقدر يتابع بعنيه اي حاجة بتتحرك فوقه او قدامه و ده طبعا تقدم كبير في نظر الطفل. عشان كدة حاولي تعلقي فوق سرير الطفل لعبة تكون بتتحرك و آلوانها اما تكون ابيض و اسود  او ليها آلوان مبهجة تشد انتباهه. هتلاحظي ان الطفل ابتدى يحاول يمد ايديه عشان يمسكها او حاول يطولها برجليه. و على فكرة مش لازم تكون لعبة غالية ممكن انتي اللي تعنلي اللعبة بنفسك او تستخدمي خامات بسيطة زي المستخدمة في نظام المونتسوري. الطفل كمان خلال الفترة دي من عمره بيحب الالعاب اللي فيها تكرار عشان فضوله بيخليه دايما عايز يعرف العلاقة بين الفعل و رد الفعل. عشان كدة ممكن مثلا تعلقي جرس فوق الطفل كل ما يلمسه يآيده يتهز و يرن او كرة لما يلمسها   تتحرك. كل الامثلة دي هتلاقيها في الصور (برجاء الضغط عالصورة لعرض كل الصور الملحقة)






آلعاب للآطفال عمر 6 شهور و حتى السنة

عزيزتي الآم، اخيرا الحمد لله الاربع شهور الآولى عدوا على خير و سلام. احب ابشرك ان اللي جي بآذن الله اسهل لآن خلاص طفلك ابتدى يكبر بجد و ابتدى الخطوات الآولى في التعبير عن نفسه سواء من خلال الاشارة و بعض الحروف او تعبيرات الوجه اللي بتفهمك احتياجات طفلك. كمان المرحلة دي في تغييرات لا حصر لها في نمو طفلك من بداية المشي لبداية الكلام و الزحف و التسنين و تنظيم مواعيد النوم و النوم لساعات اطول و بداية الآكل و تحكم اكتر في عضلات الجسم و الآيدين و غيرها و غيرها من مراحل النمو اللي طفلك محتاج مساعدتك فيها عشان تعدي المرحلة دي كمان بسلام ان شاء الله.

النهارة و بكرة هنتكلم بس عن الآلعاب اللي ممكن تشتريها لطفلك عشان تسليه و تساعد على نموه الصحي خلال المرحلة دي. تابعينا عشان الفترة اللي جية هنتكلم على انشطة تانية كتير ممكن تعمليها بآيدك لطفلك.

بداية الكلام لازم نبدآ نقلل الفترات اللي الطفل بيقضيها متححد و متقيد في كرسي هزاز او كرسي العربية او آي مكان تاني ممكن يعيق حركة الطفل. البيبي دلوقتي محتاج يمرن عضلات رجليه عالزحف و الحبي و عضلات ايديه على انه يرفع نفسه لما يكون نايم على بطنه. افرشي غطا كبير عالآرض و سيبي طفلك عليه معظم الوقت و حواليه آلعابه عشان يتشجع انه يتحرك بحرية و يستكشف. لما طفلك يبدآ يسند عالكراسي و الترابيزات و حسيتي انه مستعد انه يتدرب عالمشي بلاش المشيات اللي الطفل بيتحبس جواها لآنها بتآخر المشي (على عكس الشائع بين كتير من الناس) و بتخلي الطفل يتعود انه يمشي على اطراف اصابعه بدل ما يمشي عالقدم كلها.

bad.jpg

  لو لازم ولابد يبقى يفضل المشايات اللي بتكون ليها ايد الطفل يسند عليها زي دي 

walker.jpg