غالبا الطفل بعد سن الست شهور بيحاول يستخدم ايده اكتر في انه يمسك اي حاجة قدامه، رغم انه لسة صعب عليه يتحكم في عضلات الابهام و السبابة مع بعض لكن ممكن تستغلي حركة ايديه دي في انك تمرنيه على مسك كوباية مية المحكمة الغلق بتاعة البيبيهات او ازازة اللبن بتاعته. انا عن نفسي بدآت مع بناتي اول ما تموا اربع شهور و فعلا بعدها بشهر او اتنين كانوا بيمسكوا الازازة (البزازة) لوحدهم. النصيحة دي طبعا هتقدرها اوي اي ام لتؤام بتعاني كل يوم في مسك ازازتين لطفلين في نفس الوقت 😉
كمان هتلاحظي ان في بداية المرحلة دي الطفل بيحب جدا انه يخبط الآلعاب ببعضها او يرميها عالارض بالذات لو كان على سريره او على كرسي الآكل عشان كدة حاولي متبينيش استياء او زهق من الموضوع ده لان دي وسيلة الطفل في التعرف على العالم اللي حواليه. هو ابتدى يكون عنده ادراك اكتر ببعد و قرب المسافات و العمق و الارتفاع و نظرية ان لكل فعل رد فعل. عشان كدة هو بيحاول يفهم ايه اللي هيحصل لما يرمي اللعبة في الارض هتروح فين؟ و ايه اللي هيحصل لما هيخبط الالعاب في بعضها؟
بعد مرحلة الرمي دي و قرب نهاية سن ال٨ شهور بيكون عند الطفل تحكم احسن بكتير في عضلات ايديه و الابهام و السبابة اللي بتساعده يمسك الحاجة اللي في ايديه بحرص اكتر. حاولي في الفترة دي تقدمي للطفل خضار او فاكهة متقطعة في شكل مكعبات صغيرة و تسيبيها قدامه عشان يتعلم يمسك بصوابعه او مثلا قطعة بسكوت صغير او حلقات صغيرة بس المهم انها تكون بتبوش في البق و ميكونش فيه منها خطر اختناق و الاكلات دي او finger food بيعتمد فيها الطفل على صوابعه و تحكمه فيهم. متفكريش ان الموضوع سهل لآنك في الاول هتفاجئي ان طفلك بيقدر يمسك الاكل لكن مش بيقدر يتحكم في عضلاته و يسيبه او بيكون لسة مش لاقي بقه فين من اصله😃
من اهم الحاجات بردو اللي بتشد اهتمام الاطفال جدا في السن ده هو الاشكال و الاحجام المختلفة للحاجات اللي بيشوفها كل يوم. (ملحوظة: لسة بدري جدا على ما طفلك يبدآ يتعرف عالآلوان و يميزها و يحفظ اسمائها، احيان كتير المرحلة دي بتتآخر لبعد عمر السنتين.) حاولي دايما تكلمي مع طفلك عن الاحجام (كبير، صغير) و عن الاشكال (مربع، مستطيل، مثلث...الخ)
ممكن تجيبي صندوق تمليه حاجات من نفس الشكل و تغيري الشكل كل ١٠ ايام او اسبوع. مثلا رسمة لمثلث، و شريحة بيتزا او فطيرة لعبة، و علبة صغيرة مربعة بتتقفل و تتفتح، و مجسم لمربع تحطيهم كلهم مع بعض عشان تعرفي الطفل على شكل المربع و هكذا.
الفكرة اللي في الموقع ده كمان عجبتني. هي عبارة عن كتاب معمول من قماش الجوخ و ميزته انه مش بس بيعلم الاطفال الاشكال بس لكن كمان بينمي الادراك عندهم عن طريق اللمس
فكرة تانية بيحبها الاطفال جدا هي لعب المتطابقات اللي هي بداية او تقديم للعبة البازل بعدين. خاصة ان الطفل بعد سن ال٨ شهور بيقدر يرفع الحاجة من الارض و يحطها في مكانها و بتتكون عنده بداية قدرات التفكير و التخطيط و حل المشاكل. ده غير ان العاب المتطابقات بتنمي قدرة الطفل عالتنسيق بين حركة ايديه و نظره (تآزر بصري و حسي) دي بعض الالعاب اللي استعملتها مع بناتي و حبوها او اللي ممكن ارشحها للسن ده
لعبة المتطابقات اللي ليها مقبض بتسهل عالطفل مسكها لحد ما يتعلم الغرض من اللعبة. او . المتطاباقات بدون مقبض كمرحلة متقدمة . في نهاية السنة الآولي من عمر الطفل ممكن تستهويه لعب مستواها اعلى زي صندوق الاشكال و اللي فيه منه اشكال كتيرة فطبعا بنبدآ باللعب الاسهل و مع الوقت ننتقل للآصعب
و طبعا لعبة المتطابقات من الالعاب اللي سهل تعمليها بآيديكي بآنك تجيبي اي مجسمات لآشكال مختلفة و تحطيها على ورقة بعدين تحدديها بقلم و ممكن تضيفيلها لزق كوتشي . . عشان المجسم يمسك في الرسمة الي بتتطابق معاه. ادخلي عالرابط ده لتفاصيل اكتر.
طبعا ممكن تقروا كتب و تسمعوا و تشوفوا سوا اغاني عن الاشكال (حاولي دايما وقت التليفزيون يكون تعليمي و له علاقة بالمرحلة التعليمية اللي طفلك فيها) ده غير ان فيه تطبيقات كتير على اجهزة المحمول و التابلت لتعليم الاشكال.
يا رب تكون الحلقة النهاردة عجبتكم و بكرة ان شاء الله هنكمل بآنشطة تانية بس لنهاية السنة الاولي (٩-١٢ شهر)