أفكار أنشطة ما قبل الكتابة

بعض أفكار لأنشطة للأطفال من سن ١٨ شهر أو سنتين. الأنشطة كلها بسيطة و تعتمد على مواد غير مكلفة و متواجدة في كل بيت و يفضل استخدام هذه الأنشطة مع الأطفال بدلاً من الألعاب التجارية لأنها تعمل على تنمية و تمرين العضلات الدقيقة في يد الطفل و تؤهله لاستخدام القلم بشكل صحيح للكتابة في مرحلة متقدمة.

IMG_5367.jpg

 

مجموعة من نماذج الحيوانات المصنوعة من البلاستيك و المثبتة على صينية بشريط لاصق. طبعاً يعتمد الطفل على عضلات الأصابع الدقيقة عندما يقوم بنزع اللاصق.

IMG_5503.jpg

نفس فكرة الشريط اللاصق و لكن فقط بلصقه على طبق و يقوم الطفل بخلعه

IMG_5505.jpg

صلصال و شفاطات و مكرونة: فكرة بسيطة و تنمي المهارات الحركية الدقيقة عند الطفل

IMG_5370.jpg

 

نشاط فتح و قفل العبوات. هذا النشاط يدرب الطفل على حل المشكلات و ينمي ذكاء الطفل و قدرته على إيجاد علاقات بين الأشياء و بعضها بالأضافة لتقوية عضلات اليدين. يمكن طبعاً ان يقدم نفس النشاط بأكثر من شكل كل مرة: علب و بطرمانات و زجاجات و أكياس حمل النقود و حقائب... الخ.

IMG_5368.jpg

فك و تركيب كشاف للطفل الهاوي لفك و تركيب الأشياء. هذا النشاط غير أنه يرضي فضول الطفل يدرب عضلات يديه أيضاً على لف أصابعه في اتجاهات مختلفة و ينمي قدرته على الابتكار و حل المشاكل (طبعاً الأم تحاول ترك الطفل يكتشف لوحده النشاط و كيفية فك و ربط الكشاف)

IMG_5369.jpg
IMG_5375.jpg

نشاطين مختلفين يتعلم الطفل من خلالهما ان يغسل باستخدام فرشاة. ممكن تقديم النشاط بأكثر من شكل. يعني مثلاً نتدرج في حجم الفرشاة و ننوع في الأشياء المطلوب غسلها: مثلاً حبة بطاطس أو جزر او حجارة او نموذج حيوان بلاستيك... إلخ. و طبعاً لأن النشاط  فيه استخدام ماء يرضي عند الطفل حاجته الحسية

IMG_5374.jpg

 

وضع العملات المعدنية في حصالة أو علبة لها فتحة ضيقة من أكثر الأنشطة المفضلة للأطفال في فصلي. تفضل ان تكون عملات معدنية ليست بلاستيكية لأن صوت رنينها يشبع حاجة حسية عند الطفل. يلاحظ ايضاً أن في هذا النشاط  الطفل يستخدم نفس الأصابع المستخدمة في الكتابة (الإبهام، السبابة، و الأوسط)

IMG_5510.jpg

باستخدام الملقاط او أي أداة دقيقة يحاول الطفل إخراج كرات البوم بوم بدون قطع الخيوط المثبتة في الصندوق

IMG_5509.jpg

مضرب طبخ يدوي و ما يعرف بكريات البوم بوم يحاول الطفل إخراجها من فتحات المضرب

 

ماما عايزة اتفرج

النهاردة بعيد شوية عن الحقائق العلمية هتكلم عن تجربة شخصية ليا مع بناتي.  مؤخرا لاحظت مع بناتي تكاسل كبيرعن المشاركة في الواجبات المنزلية و ده لاننا مع الدراسة كان الوقت اللي بنخصصه لده أقل بكتير أو ببساطة لأي عذر تاني بيطلعوا بيه. فكان لازم افكر في طريقة تخلي الأمور أهون شوية عليهم و عليا. ولأن بناتي عدوا الست سنين فكان لازم افكر في حل يكونوا هم شركاء فيه ويكون مبني على اتفاق مسبق. قعدنا سوا أنا و هم و فكرنا و قالوا لي صراحة على مشاكلهم و على رأيهم في قصة المشاركة دي اللي طبعا هي في نظرهم مهام شاقة و انهم غير مطالبين بيها. كان ساعتها ضروري جدا أني أتكلم عن مشاعري و ان أنا كمان ووالدهم بنتعب عشان نشيل مهام البيت (وده يمكن كان اهم مبدأ اتبعته في تربية بناتي انهم يعرفوا مشاعر اللي قدامهم و يحطوا نفسهم مكانه عشان يقدروا يحكموا عالمواقف صح). بعد نقاش و تفكير قررت باتفاق معاهم ان التليفزيون مش حق مكتسب ولكن وقت راحة سلبي (يعني مش منتج زي مثلا هواية أو رياضة) و بالتالي الحصول عليه بيكون بس بعد ما نتعب وننتج ونكون فعلامحتاجين الوقت ده. 

:شروط الاتفاق


كل مهمة فالبيت يقابلها عدد دقائق أنا اللي أحددها من مشاهدة التليفزيون -

غير مسموح بأكثر من٣٠ دقيقة يوميا من المشاهدة -

لهم حرية الاختيار انهم ينفذوا كل المهام و يكسبوا الثلاثين دقيقة أو عمل بعضها فقط و بالتالي بيكون الوقت اقل -

هناك مهام ليس لها أي علاقة بالاتفاق ده زي ترتيب السراير -

وقت المشاهدة في عطلة نهاية الأسبوع لا يدخل ضمن الاتفاق ده (لأن كان لازم يحسوا ان صوتهم و اقتراحتهم في الاتفاق ده مسموعة و إلا هيكون- اتفاق غيرمبني على تكافؤ الطرفين في حق فرض شروطه

طيب السؤال هو: هل الاتفاق ده يعتبر ثواب و عقاب (شيء أنا ضده من زمان)؟ لا طبعا الاتفاق ده نتيجة طبيعية لتصرفاتهم و بشروط هم جزء من تحديدها و مبني على حوارو نقاش.  ده غير ان الا تفاق ده بيحاكي الحياة الحقيقية: في الشغل بنتعب زيادة بيكون فيه مميزات نتيجة التعب ده

طيب كمان سؤال: ايه علاقة ده بمنهج المونتسوري؟ بالنسبة للأطفال بعد سن الست سنوات (احيانا الخامسة) في فصل المونتسوري أنا كمعلمة بمضي معاهم عقد (ورقةحقيقية و احنا الاثنين بنمضي عليها) بمجموعة مهام (بيحددها الطفل وممكن أساعده في اختيارها لو طلب أو ان كانت لا تتناسب مع قدراته) و بعد الانتهاء من المهام بنمضي تاني العقد وبيكون من حق الطفل ميزة خاصة. مثلا في فصلي بسمح للطفل بقرأة قصة لأصحابه لأصغر سنا أو انه يقضي وقت زيادة في ملعب المدرسة… الخ


الاتفاق ده بدأناه من حوالي سنة و الحمد لله لازلنا مستمرين عليه. مش بس الاتفاق ده قلل من الشد والجذب اللي بينا بخصوص المهام المنزلية لكن كمان مع الوقت بدأت اشوف مميزات أخرى زي المهام المنزلية بتزيد من ثقة الطفل في نفسه لانه بيحس انه عضو منتج في البيت زيه زي الكبار و اننا لسنا في غنى عنه. وده بالضبط اللي أتكلمت عنه دكتورة.مونتسوري في أهمية إسناد أعمال جسمانية للطفل من خلالها يساهم في نظافة البيئة من حوله و الاعتناء بيها

مع الوقت و عشان أغير الروتين بدأوا بناتي يطلبوا مهام جديدة و بالتالي بقيت بسند ليهم مهام جديدة بتتطلب انهم يتعلموا مهارات جديدة. مثلا بدل الكنس بالمكنسة اليدوية كل مرة بقوا يستخدموا المكنسة الكهربائية مرات

لاحظت ان المجهود البدني المبذول قبل وقت التليفزيون بيقلل كتيرمن نوبات تغير المزاج اللي بتحصل بعده نتيجة لما يحدثها التليفزيون من استثارة زائدة للمخ

لاحظت ان بناتي بيكونوا فخورين قدام صحباتهم انهم بيستخدموا المكنسة الكهربائية وانهم بيغسلوا الأطباق لوحدهم وانهم مسموح ليهم يستخدموا السكين.... إلخ

مؤخرا فتحت المجال اكثر للبنات انهم يختاروا المهام بنفسهم و فعلا لاقيت انهم بيختاروا اختيارات ناجحة كتنظيف مكان مثلا محتاج عناية زائدة (و بكدة غيرنا شروط الاتفاق تدريجيا بما يتناسب مع المرحلة اللي بناتي بيمروا بيها

في الصورة التالية أمثلة لبعض المهام المناسبة للأطفال من سن الخامسة و النصف للسابعة


IMG_4998.JPG

انشطة الاطفال من سن ٣-٦ شهور #الحلقة الرابعة

بالنسبة للآلعاب و الانشطة المناسبة للاطفال من سن ٣-٦ شهور دي هتكون اخر حلقة النهاردة ان شاء الله. تابعونا عشان هنبدآ سلسلة الالعاب لسن ٦ شهور الاسبوع اللي جي بآذن الله. طبعا كل الافكار دي على سبيل المثال و ليس الحصر يعني ممكن تبتكري انتي افكار من عندك او تدوري عالنت و الافكار ملهاش اول من اخر. بما اننا كنا بنتكلم على اهمية الرياضة للاطفال خلونا نبدآ بتمرين رياضي مهم جدا للاطفال في السن ده:

٨. النوم على البطن: مهم جدا انك تعودي طفلك انه ينام على بطنه من نص ساعة لساعة اول ما يتم التلات شهور لآن ده بيكون زي تمرين الضغط بتاع الكبار... بيقوي العضلات و يساعد الطفل انه يحاول يتقلب و يقوي عضلات رقبته. اهم حاجة طبعا انك لازم تكوني جنب طفلك و هو في الوضع ده و انك متسيبهوش ابدا ينعس و هو على بطنه عشان خطر الاختناق الله لا يقدر. احيانا ممكن تكون عضلات الطفل ضعيفة او لسة مبيقدرش يتقلب فممكن يختنق لو نام على وشه و معرفش يتنفس. عشان تشجعي طفلك انه يرفع راسه و يتقلب ممكن تحطي جنبه اي لعبة هو بيحبها و يا سلام لو بتنور او بتعمل صوت يلفت انتباهه. كمان يا ريت تنامي جنب طفلك و تخلي راسك في مستوى راسه الاطفال في السن ده بتحب تدرس تعبيرات الوشوش جدا. 

٩. موضوع تعبيرات الوشوش ده ياخدنا لنشاط تاني شائع في نظام المونسوري انك تحطي مراية جنب طفلك لآنه بيحب جدا انه يتابع حركات جسمه و يشوف وشه فيها. بالنسبالي موضوع المراية دي اللي شجع بنتي انها ترفع راسها و تبص.

١٠. شجعي المهارت الحسية و حاسة اللمس و التعرف عالآشياء من خلال اللمس بآنك تحضريله علبة او صينية فيه حاجات امنة من اللي موجودة في البيت بس ياريت تكون الحاجات دي مختلفة في الملمس و الصوت و الشكل بحيث انك تنشطي كل حواس الطفل. امثلة للي ممكن تحطيه في العلبة: مكعبات، كور، فرشاة شعر صغيرة، كوباية بلاستيك، مشبك، حيوانات بلاستيك، قطعة ليفة صغيرة، شرايط قماش صغيرة، جرس... الخ.

الفكرة دي علمتهالي مامتي اول ما ابتديت اعلم البنات الاكل. كتير من الناس بيلهوا الاطفال بالتليفزيون عشان يعودوهم عالآكل لكن غير الاضرار الصحية للتليفزيون خاصة للاطفال تحت سن التلات سنين الا ان كمان البيبي بيسرح في التليفزيون و بينسى يمضغ. جربي تطفي التليفزيون و تديله في ايده اي حاجة من حاجتك بيمسكها لآول مرة و استمتعي بكم الانبهار اللي هتشوفيه في عيون البيبي. اديله علبة مكياج و سيبيه يلعب بيها لحد ما يكتشف ازاي يفتحها او طبق بلاستيك عميق و مضرب سيلكون و علميه يقلب او ازازة فاضية حطي فيها شوية رز و خليه يرجها او عصارة ليمون و سيبيه يفتح و يقفل فيها... او اي فكرة تانية تيجي في بالك. متنسيش ان الحاجات اللي انتي متعودة عليها في حياتك اليومية جديدة لانج في ذاكرة طفلك. و دايما افتكري ضرورة اللغة و انك تكلمي و توصفي كل حاجة بتعملوها.

١١. صلصال آمن للآكل: قوي قلبك و افرشي مفرش بلاستيك عالآرض و استعدي للغوصة. قلبي كوباية دقيق رز ناعم مع ٣ معالق كبيرة زيت جوز هند سايح و خلي الخليط يبرد. طبعا الصلصال ده للطفل بعد سن الاربع شهور يعني بيعرف يقعد و يمسك ضهره عشان يقدر يلعب بالصلصال. (يفضل تستشيري طبيبك لو خايفة يكون فيه حساسية من جوز الهند)

١٢. اكياس الالوان: قلبي كام معلقة زبادي بنقطة آلوان طعام و حطيهم في كيس و اقفلي عليهم كويس بحيث يكون فيه مساحة للزبادي انه يتحرك. ادي الكيس للطفلك و سيبيه يلعب بالكيس على ترابيزة الاكل هيشده اوي منظر الزبادي و هو بيتحرك في الكيس. زيادة امان ممكن تلزقي الكيس بلزق زي بتاع الدهان من كل الجوانب عالترابيزة بحيث ان البيبي ميقدرش يشيله من مكانه و يحطه في بقه. لو وصلتي لمرحلة انه امان للطفل انه ياكل زبادي ممكن تحطي معلقتين تلاتة من الزبادي الي مضافلة نقطة الوان طعام على ترابيزة الكل بتاعة البيبي او اي سطح نضيف و سيبيه يلون و يشخبط و ياكل براحته. 

يا رب تكون الانشطة عجبتكم و ياريت تقولولي لو عملتوا حاجة منها مع اطفالكم و كان رد فعلهم ايه؟

انشطة الاطفال من سن ٣-٦ شهور #الحلقة الثالثة

لسة بنتكلم عن الآطفال من سن ٣-٦ شهور. لاحظت ان فيه ناس كتير اعجبت بالتمرينات الجسدية بتاعة الاطفال في السن ده لفوائدها اللي اتكلمنا عليها فقلت نتكلم شوية زيادة عليها النهاردة. لما كان بناتي عمرهم ٥ شهور حضرت بيهم مجموعة حصص للتدريبات الرياضية اللي طبعا تنفع طبيعة جسمهم الصغير و اللي لاحظت انها حسنت نومهم بشكل ملحوظ. ابتديت اتواصل مع مدربة البرنامج ده و دلتني على مجموعة فيديوهات و كتب فادتني جدا في اني اقوم بالتمرينات دي بنفسي مع بناتي في البيت. النهاردة حبة اشارككم معايا ببعض من المصادر دي اللي انا متآكدة انكم هتحبوها جدا لما تجربوها مع اطفالكم. 

الكتاب اللي هتلاقوه في البوست اللي جي ده آلفته مدربة يوجا متخصصة في مساج و تدليك الاطفال الرضع اسمها Helen Garabedien. و هي نجحت في انها تصمم اكتر من ٧٠ كورس خاص برياضة الاطفال في مختلف الاعمار لآيمانها بدور الرياضة و اهميتها منذ الصغر. في وجهة نظرها لعب اليوجا مع الاطفال الرضع بتطود العلاقة بين الآم و طفلها و تسهل الهضم و تحسن النوم. هي ببساطة بتقسم اليوجا لعدة اوضاع ليها تآثير ايجابي معين على كل جزء من اعضاء الجسم. اهم حاجة بآه لو طفلك اقل من ست شهور و لاقتيه بيعيط عمال على بطال من غير سبب الترينات دي كويسة جدا في تهدئة الاطفال. البرنامج اللي هي صممته اسمه Itsy Bitsy Yoga و هتلاقيله فيديوهات كتيرة جدا عاليوتيوب.

حاولي تخصصي عشر دقايق لربع ساعة في اليوم تعملي شوية تمرينات مع طفلك و ياريت يكون بردو من روتين يومك مع طفلك عشر دقايق قراية قرآن سوا و قراية اي نوع من الكتب الخاصة بالاطفال. مفيش حاجة في الدنيا ممكن توطد علاقتك بطفلك و تقربه منك اكتر من وقت تقضيه معاه مخصص تماما له سواء في القراية او القرآن او الرياضة. و دايما فكري ان الوقت اللي بتقضيه النهاردة مع طفلك هو اللي هيتردلك بكرة 

https://www.youtube.com/watch?v=68z8oTAxjQY

https://www.youtube.com/watch?v=gFYKUHzbd74

https://www.youtube.com/watch?v=9i4HSQAP9_4

ده الكتاب اللي حكيت عنه  الخاص بتمرينات اليوجا للآطفال الرضع. الكتاب فيه مجموعة صور كتيرة جدا بتوضح كل وضع و كيفية تطبيقه مع الطفل.

http://amzn.to/1wSzMO9

فيه كمان نسخة تانية من الكتاب ده لروتين يومي مدته ٨ دقايق يوميا للآطفال من سن سنتين لخمسة

http://amzn.to/1vZzSZ3

انشطة الاطفال من سن ٣-٦ شهور # الحلقة الثانية

نكمل النهاردة بقية سلسلة الآلعاب و النشاطات الخاصة بالآطفال الرضع من سن ٣-٦ شهور. بما ان السن ده بيكون فيه بداية التسنين فخدي بالك في اختيارك كل آلعاب طفلك لحد سن السنة ان اي لعبة لازم تكون امان من ناحية النضافة و ان ميكونش فيها اي اجزاء حادة او مكسورة لآن طبعا اي لعبة هيحطها البيبي في بقه عالطول. 

٤. آلعاب سمعية: زي الجرس و الشخشيخة اللي من اهم مزاياهم انهم بيقوا حاسة السمع عند الاطفال و قدرتهم عالتمييز بين الاصوات. ممكن تجيبي مجموعة علب او تحطي فيها حاجات مختلفة زي بقول او رز او مكرونة و تحكمي غلقها كويس بمسدس الشمع و تسيبيها للبيبي يلعب بيهم و يكتشف الاصوات.

٥. العاب للتسنين: طبعا مفيش بيبي معندوش عضاضة   ودي مفيدة انها تقوي اللثة و تخفف من وجع التسنين. كمان من اشهر انواع العضاضات سلسة المفاتيح البلاستيك اللي فيها مجموعة مفاتيح من الوان مختلفة تساعدك انك تكلمي مع طفلك عن الالوان بعدين.

٦. انشطة لتقوية عضلات الجسم: ماما كانت دايما بتنصحني بشوية تمرينات خفيفة للبيبي و فعلا لما قريت عنها لاقيت ان التمرينات دي بتساعد الطفل عالتخلص من الغازات اللي بتمنعه من النوم و بتقوي عضلات جسمه و بتحضره لمهارات جسدية تانية هيحتاجها بعدين عشان يقدر يقف و يمشي و يمد ايده عشان يطول حاجة، ده غير ان التمرينات دي بتساعد البيبي عالاسترخاء و تجهزه لنوم احسن. عشان كدة خلي التمرينات دي من روتين ما قبل النوم بتاع البيبي كل ليلة. التمرينات البسيطة دي ممكن تكون زي انك تفردي و تتني رجليه من عند الركب جامد تجاه بطنه كمان امسك ايدين البيبي و افتحيها و اقفليها اكنه بيدي حضن و كذلك لرجليه. تمرين تاني انم تمسكي تاخدي الايد اليمين مع الرجل الشمال و تقفليهم و تفتحيهم مع بعض و تككري نفس الموضوع مع الرجل اليمين و الايد الشمال. اخر تمرين ده مفيد جدا للتنسيق العضلي بتاع البيبي و بتزود ادراكه باجزاء جسمه و قدراته. طبعا اكرر تاني متنسيش دور اللغة و انتي بتلعبي اي لعبة. كرري اسماء اجزاء الجسم كتير عشان تتحفظ. في كتير من الدول بيعملوا برامج مخصوصة اللتمرينات الرياضية للبيبهات من الولادة و حتى السنة الآولي زي اللي في الفيديوهات دي:

http://www.youtube.com/watch?v=-eMaDMjjRWg

(ده تمرين رياضة قريب جدا من لعبة الطيارة اللي اتكلمنا عليها الحلقة اللي فاتت)

http://www.youtube.com/watch?v=-dzEDB-WvZ8

انشطة الاطفال من سن ٣ - ٦ شهور #الحلقة الاولي

انشطة الاطفال من سن ٣ - ٦ شهور #الحلقة الاولي

لاحظت ان كتير بيسآل عن الالعاب و الآنشطة اللي ممكن نعملها مع الاطفال لكن سامحوني عشان بيكون صعب الرد على كل سؤال على حدا كل فترة هحط مرحلة عمرية معينة و الانشطة و الآلعاب اللي تنفع معاها و اللي من خبرتي الشخصية جابت نتيجة كويسة مع بناتي. الاسبوع ده هنتكلم عن البيبيهات من سن تلات شهور لقبل الست شهور عالطول عشان الست شهور دول عايزيين ليهم بوست لوحدهم  الاطفال في التلات شهور دول بيمروا بحوالي طفرتين او تلات طفرات نمو. يعني وزنهم بيزيد بشكل ملحوظ و مهاراتهم الحركية كمان بتتقدم جامد عشان كدة متستغربيش لو مرة واحدة البيبي بتاعك قعد لمدة كام يوم بيطلب لبن كتير جدا علي غير عادته و مزاجه مقريف و مبينامش عدل و بيصحى في عز الليل جعان و مش قادر يستنى ترضعيه او تحضريله البيبرونة 🍼 كمان حاسة السمع و الرؤية عند البيبي بتزيد اوي في الفترة دي فهتلاقيه ابتدى يتابعك بعنيه و انتي جية عليه من بعيد و ممكن يخاف من اي صوت مفاجئ بسسب التغيرات دي. بناء على الكلام ده البيبي دلوقتي مستعد انك تبدآي معاه شوية آلعاب و انشطة يومية تنمي قدراته. دي شوية اقتراحات يا رب تعجبكم و تابعموني عشان بكرة ان شاء الله هحط افكار تانية:

١. لعبة الطيارة : شيلي البيبي على دراعاتك على وشه و لفي بيه زي الطيارة. لفوا في نفس الاماكن في الشقة كل يوم و انتي بتلفي كرري اسامي الحاجة اللي انتي شايفاها: "شباك، باب، زرع، ترابيزة..." و هكذا. النشاط ده مهم لحاجات كتير: اولا انتي بتثري اللغة بتاعة طفلك بتكرار الكلمات الآساسية كل يوم (اوعي تقولي ده لسة صغير مش فاهم حاجة)، كمان الشيل بالطريقة دي مفيد انه يطلع الغازات من بطن البيبي اللي بتتعبه و يخليه يعيط كتير (ساعات كمان الشيلة دي  بتكون اسلوب كويس لتنييم البيبي)، كمان زي ما شرحت البيبي عينيه ابتدت تتعلم تتابع و ده هيفيده كتير في تنمية المتابعة و زيادة فضوله الوضع ده لتنييم البيبي لما يكون مريقف. ساعة اللعب شيلي البيبي كدة و ابعدية شوية عن جسمك بس و انتي لسة متحكمة فيه و العبوا لعبة الطيارة.

٢. الكتب📚: الكتب اللي معمولة من كاوتش او قماش حلوة جدا ان البيبي و هو بعيد عنك ينشغل فيها و ينمي مداركه و يعضعض براحته (مع بداية التسنين خدي بالك ان كل حاجة البيبي هيحاول يختبر صلاحيتها للآكل ) 
الكتب البلاستيك او الكاوتش دي بردو مسلية انك تديها للبيبي لما يتم سن الست شهور يلعب بيها و هو بيستحم

http://amzn.to/1EAgQdH

٣. اللعب المصنوعة من الاقمشة: و دي عن خبرة شخصية من اكتر الآلعاب اللي بيحبها البيبيهات في السن ده. اعملي علبة و حطي فيها مجموعة من الآقمشة المختلفة: (صوف، حرير، قطن، فرو...) و حطي البيبي على رجلك و افتحوا العلبة سوا و استكشفوها (بردو متنسيش تستخدمي اللغة متخليش ابدا الوقت اللي بتقضيه مع البيبي فيلم ابيض و اسود صامت) اللعبة دي بتنمي ادراك الطفل و قدراته الحسية. معظم آلعاب الفترة دي بتعتمد على حاسة اللمس عند البيبي. 

اللعبة دي (Taggies) عبارة عن قماشتين متخيطين على بعضهم من الناحيتين و متبطنين و قبل ما تقفليهم تخيطي فيه الشراشيب دي اللي هي عبادة عن شرايط قماش بردو. بناتي كانوا بيحبوا جدا اللعبة دي و كانت بتشغلهم بالساعات.

ممكن تشتريها من:
http://amzn.to/1C9XIn8

او تعمليها بنفسك:
http://backtoherroots.com/2014/09/11/tutorial-diy-lovey-tag-blanket/

http://www.youtube.com/watch?v=49v3ya_jfbg

لو عايزيين افكار تانية لسن التلات لما قبل الست شهور تابعوني خلال الآسبوع ده. برجاء فتح كل صورة على حدا لمعلومات اخرى.

آلعاب الاطفال من سنة ٦ شهور و حتى السنة #الحلقة ٤

زي ما قلنا قبل كدة الاطفال في السن ده بيهتموا جدا بآنهم يذاكروا تعبيرات وشوش الناس اللي حواليهم و خصوصا الآم. عشان كدة مهم جدا انكم تبدآوا تتكلموا عن التعبيرات دي و تمرني طفلك عليها. وري طفلك وشك و انتي بتضحكي و قولي (سعيدة او مبسوطة او ضحكة) و بعدين خليه يقلد الوش في المراية اللي انتي مسكاها. انا شخصيا اللي فاد بناتي جدا في تعلم تعبيرات الوجه هي مجموعة كتب جاتلهم هدية عن الناس و تعبيراتهم و كنا بنقراها كل  يوم لحد ما بعد فترة كانوا بيقدروا يقلدوا اي تعبير وجه نطلبه منهم. مجموعة الكتب دي حجمها .صغير و فيها كتب عن تعبيرات الوش و الاعداد و الاكل و حركات الجسم و اجزائه و غيرها او اي كتب او صور ممكن تلاقيها تعلم نفس المفاهيم بصور مبسطة و واقعية (متحاوليش تقدمي شخصيات خيالية كتير في السن ده عشان الطفل لسة مش هيستوعبها)

 

من الحاجات اللي بردو بتشد اهتمام الاطفال جدا من عمر العشر شهور تقريبا هي الحيوانات. يمكن لآنه عالم جديد و غريب عليهم مليان بالآشكال و الالوان و الاصوات و الاسماء و البيئات المختلفة و يمكن لآن الطفل بالفطرة بيحب الطبيعة و كل حاجة فيها. و الهوس بعالم الحيوانات ده هيستمر لسن كبير يمكن لبعد سن الحضانة. عشان كدة هتلاقي ان معظم و امتع قصص الاطفال اللي ابطالها حيوانات و ممكن من خلالها و مع الوقت تعلمي طفلك يعطف عالحيوانات و ازاي يتعامل معاها. حاولي تدوري عالكتب اللي فيها صورة الحيوان و ملمس مختلف لكل صورة زي صورة خروف و جزء من الصورة فرو عشان تنمي حاسة اللمس عند الطفل و يقدر يميز بين كل حيوان و التاني. و من خلال العالم الحيوان بردو ممكن تعلميه مفاهيم كتيرة جدا لا حصر لها. عموما في السن ده بس بتركزي على اصوات الحيوانات و اسمائها. بتبدآي ب٣-٤ حيوانات اساسية و مع الوقت تزودي. يفضل طبعا انك تبدآي .بالحيوانات اللي الطفل بيشوفها قدامه زي الكلب و القطة و العصفورة و العنكبوت... الخ بناتي كانوا بيحبوا المجسمات بتاعة الحيوانات خصوصا اللي فيها نفس الحيوان الام و الصغير بتاعها. بتلخبطي الحيوانات و تخلي الطفل يحط كل حيوان كبير مع الصغير بتاعه. و لما الطفل يكبر شوية عند سن ١٨ شهر ممكن تجيبي صور حيوانات من مجلات او كتب و تخلي الطفل يوصلها مع المجسم فبكدة الطفل بيتعلم ان رغم ان "القطة" اللي في الصورة لونها رمادي لكنها لسة "قطة" زي القطة "البيضا اللي في المجسم

لو بتحاولي تطبقي نظام المونتسوري مع طفلك في البيت يبقى مهم جدا انك تعلمي طفلك التآمل و الاستمتاع بالطبيعة. يعني لما تخرجي مع طفلك في الشارع متقوليش "بص القطة" و خلاص على كدة. الفتي نظر الطفل للونها و حجمها و صوتها و اسآليه لو سامع صوت القطر او العربيات و اطلبي منه يسكت عشان يسمع صوت الناس و الهوا و المية... و غيرها من الاصوات اللي في الشارع. يا ريت كمان لو تقدري تنظمي رحلة لحديقة الحيوان لطفل عند عمر السنة و قبلها بفترة تركزي جهودك في انكم تقروا قصص عن الحيوانات و تعرفوا اشكالها و اصواتها.

mom and baby with blossoms.jpg

اخر حاجة هنتكلم عليها النهاردة هي انك متنسيش ان الطفل في السن ده بيحب التكرار. متمليش لو طلب منك نفس اللعبة مرارا و تكرارا و متحاوليش تخبي منه اللعبة طول ما هو مبسوط بيها. كنت زمان بفتكر اني لما اشيل اللعبة اللي بناتي بيحبوها شوية ده هيخليهم ميزهقوش منها لكن بعد قرآة اكتر في نظام المونتسوري اكتشفت اني كدة بقطع رغبتهم في تعلم مفهوم و اكتساب مهارة معينة. ببساطة الطفل بيفضل يلعب باللعبة اللي بتشد انتباهه لحد ما يجيدها تماما. و افتكري ان كل طفل مختلف عن الاخر و مش لازم كلهم يحبوا نفس اللعب في نفس الوقت و لا يكتسبوا نفس الهارات في نفس  الوقت يعني الطفل اللي مشي بسرعة ممكن يتآخر في الكلام و العكس لان مخه و تركيزه كله بيكون في المهارة اللي بيحاول يتعلمها. معظم اطفال المرحلة دي بيحبوا الالعاب اللي بتعتمد على رد الفعل. يعني يحطوا الكرة تنزل في مكان معين او يدوسوا زرار حاجة تفتح و زرار يطلع صوت معين و هكذا. دي صور بعض الالعاب اللي بتعتمد على فكرة رد الفعل


العاب للاطفال سن ٦ شهور و حتى السنة #الحلقة٣)

غالبا الطفل بعد سن الست شهور بيحاول يستخدم ايده اكتر في انه يمسك اي حاجة قدامه، رغم انه لسة صعب عليه يتحكم في عضلات الابهام و السبابة مع بعض لكن ممكن تستغلي حركة ايديه دي في انك تمرنيه على مسك كوباية مية المحكمة الغلق بتاعة البيبيهات او ازازة اللبن بتاعته. انا عن نفسي بدآت مع بناتي اول ما تموا اربع شهور و فعلا بعدها بشهر او اتنين كانوا بيمسكوا الازازة (البزازة) لوحدهم. النصيحة دي   طبعا هتقدرها اوي اي ام لتؤام بتعاني كل يوم في مسك ازازتين لطفلين في نفس الوقت  😉

كمان هتلاحظي ان في بداية المرحلة دي الطفل بيحب جدا انه يخبط الآلعاب ببعضها او يرميها عالارض بالذات لو كان على سريره او على كرسي الآكل عشان كدة حاولي متبينيش استياء او زهق من الموضوع ده لان دي وسيلة الطفل في التعرف على العالم اللي حواليه. هو ابتدى يكون عنده ادراك اكتر ببعد و قرب المسافات و العمق و الارتفاع و نظرية ان لكل فعل رد فعل. عشان كدة هو بيحاول يفهم ايه اللي هيحصل لما يرمي اللعبة في الارض هتروح فين؟ و ايه اللي هيحصل لما هيخبط الالعاب في بعضها؟

بعد مرحلة الرمي دي و قرب نهاية سن ال٨ شهور بيكون عند الطفل تحكم احسن بكتير في عضلات ايديه و الابهام و السبابة اللي بتساعده يمسك الحاجة اللي في ايديه بحرص اكتر. حاولي في الفترة دي تقدمي للطفل خضار او فاكهة متقطعة في شكل مكعبات صغيرة و تسيبيها قدامه عشان يتعلم يمسك بصوابعه او مثلا قطعة بسكوت صغير او حلقات صغيرة  بس المهم انها تكون بتبوش في البق و ميكونش فيه منها خطر اختناق و الاكلات دي او finger food  بيعتمد فيها الطفل على صوابعه و تحكمه فيهم. متفكريش ان الموضوع سهل لآنك في الاول هتفاجئي ان طفلك بيقدر يمسك الاكل لكن مش بيقدر يتحكم في عضلاته و يسيبه او  بيكون لسة مش لاقي بقه فين من اصله😃

 

من اهم الحاجات بردو اللي بتشد اهتمام الاطفال جدا في السن ده هو الاشكال و الاحجام المختلفة للحاجات اللي بيشوفها كل يوم. (ملحوظة: لسة بدري جدا على ما طفلك يبدآ يتعرف عالآلوان و يميزها و يحفظ اسمائها، احيان كتير المرحلة دي بتتآخر لبعد عمر السنتين.) حاولي دايما تكلمي مع طفلك عن الاحجام (كبير، صغير) و عن الاشكال (مربع، مستطيل، مثلث...الخ)

 ممكن تجيبي صندوق تمليه حاجات من نفس الشكل و تغيري الشكل كل ١٠ ايام او اسبوع. مثلا رسمة لمثلث، و شريحة بيتزا او فطيرة لعبة، و علبة صغيرة مربعة بتتقفل و تتفتح، و مجسم لمربع تحطيهم كلهم مع بعض عشان تعرفي الطفل على شكل المربع و هكذا.

الفكرة اللي في الموقع ده كمان عجبتني. هي عبارة عن كتاب معمول من قماش الجوخ و ميزته  انه مش بس بيعلم الاطفال الاشكال بس لكن كمان بينمي الادراك عندهم عن طريق اللمس 

felt-shapes-book.jpg

 

فكرة تانية بيحبها الاطفال جدا هي لعب المتطابقات اللي هي بداية او تقديم للعبة البازل بعدين. خاصة ان الطفل بعد سن ال٨ شهور بيقدر يرفع الحاجة من الارض و يحطها في مكانها و بتتكون عنده بداية قدرات التفكير و التخطيط و حل المشاكل. ده غير ان العاب المتطابقات بتنمي قدرة الطفل عالتنسيق بين حركة ايديه و نظره (تآزر بصري و حسي) دي بعض الالعاب اللي استعملتها مع بناتي و حبوها او اللي ممكن ارشحها للسن ده

لعبة المتطابقات اللي ليها مقبض بتسهل عالطفل مسكها لحد ما يتعلم الغرض من اللعبة. او   . المتطاباقات بدون مقبض كمرحلة متقدمة . في نهاية السنة الآولي من عمر الطفل ممكن  تستهويه لعب مستواها اعلى زي صندوق الاشكال و اللي فيه منه اشكال كتيرة فطبعا بنبدآ باللعب الاسهل و مع الوقت ننتقل للآصعب

و طبعا لعبة المتطابقات من الالعاب اللي سهل تعمليها بآيديكي بآنك تجيبي اي مجسمات لآشكال مختلفة و تحطيها على ورقة بعدين تحدديها بقلم و ممكن تضيفيلها لزق كوتشي . . عشان المجسم يمسك في الرسمة الي بتتطابق معاه. ادخلي عالرابط ده لتفاصيل اكتر.

 

طبعا ممكن تقروا كتب و تسمعوا و تشوفوا سوا اغاني عن الاشكال (حاولي دايما وقت  التليفزيون يكون تعليمي و له علاقة بالمرحلة التعليمية اللي طفلك فيها) ده غير ان فيه تطبيقات  كتير على اجهزة المحمول و التابلت لتعليم الاشكال.

يا رب تكون الحلقة النهاردة عجبتكم و بكرة ان شاء الله هنكمل بآنشطة تانية بس لنهاية السنة الاولي (٩-١٢ شهر)

 

 

 

(العاب للاطفال عمر ٦ شهور و حتى السنة (الحلقة ٢

زي ما اتكلمنا الحلقة اللي فاتت ان الطفل في السن ده بيبدآ يبين تقدم كبير في تحكمه في عضلاته فتلاقي الطفل بيحاول يقعد لوحده او يحاول يسند عالكراسي عشان يقف. عشان كدة مجرد ما طفلك يتم الست شهور متنسيش تتآكدي ان البيت بتاعك فيه عوامل الامان اللي تناسب طفل في السن ده. يعني مثلا متنسيش تغطي مفاتيح الكهربا و تآمني اي اطراف حادة للاثاث عندك في البيت. يا ريت كمان لو تقدري تستغني شوية عن الفازات و الحاجات اللي ممكن تقع و تكسر في البيت. مهم جدا انك تعملي كدة لسببين: اولا عشان متآذيش طفلك لو حاجة اتكسرت، ثانيا عشان مش من العدل انك تلومي طفلك على حاجة كسرها هي اصلا مش من المفروض انها كانت تكون في متناول ايديه (المبدآ ده هيخليكي تتفادي خناقات كتييييير اوي قدام) كمان مهم انك توفري مساحة كبيرة لطفلك يحبي و يتحرك فيها براحته عشان يمرن عضلاته اللي هيحتاجها بعد كدة في القعاد و المشي

  النهاردة كمان هنركز على تنمية عضلات الطفل بآنك تحاولي تخصصي وقت لنومه على بطنه على الآقل ٣ ساعات يوميا. بس مهم جدا ان الطفل يكون صاحي و انك تكوني قدامه عشان ممكن ميعرفش يرفع نفسه بسهولة و بالتالي في خطر اختناق الله لا يقدر. حاولي تحطي قدام طفلك لعب تغريه انه يرفع راسه و هو في الوضع ده عشان يبص عليها 

maxresdefault.jpg

ممكن كمان تشجعي الطفل بآنك تحطيله مراية قدامه لآنه في السن ده بيستمتع جدا برؤية تعبيرات وشه او تنامي و ترفعي راسك في مستواه لآنه كمان بيحب يشوف تعبيرات وشك و بيتعلم منها ازاي يعبر

 ممكن بردو تحطي شوية مخدات رفيعة في المكان اللي الطفل بيلعب فيه عشان تشجعيه انه يسند عليهم او يحاول يحبي فوقهم و يتحرك اكتر او حتى يسند عليها شوية..لو بتستعملي مخدة رضاعة هتفيدك جدا في الوضع ده

الكلام ده مش معناه ان وضع النوم عالبطن هو بس اللي ممكن تستغليه في انك تنمي عضلات طفلك لكن ممكن كمان تفيدي طفلك في الاوقات اللي بتكوني مش معاه في نفس الغرفة و بيكون نايم على ضهره. عادة الطفل بعد سن ٣ شهور بيقدر يشوف الحاجات على مسافة متر منه و يقدر يتابع بعنيه اي حاجة بتتحرك فوقه او قدامه و ده طبعا تقدم كبير في نظر الطفل. عشان كدة حاولي تعلقي فوق سرير الطفل لعبة تكون بتتحرك و آلوانها اما تكون ابيض و اسود  او ليها آلوان مبهجة تشد انتباهه. هتلاحظي ان الطفل ابتدى يحاول يمد ايديه عشان يمسكها او حاول يطولها برجليه. و على فكرة مش لازم تكون لعبة غالية ممكن انتي اللي تعنلي اللعبة بنفسك او تستخدمي خامات بسيطة زي المستخدمة في نظام المونتسوري. الطفل كمان خلال الفترة دي من عمره بيحب الالعاب اللي فيها تكرار عشان فضوله بيخليه دايما عايز يعرف العلاقة بين الفعل و رد الفعل. عشان كدة ممكن مثلا تعلقي جرس فوق الطفل كل ما يلمسه يآيده يتهز و يرن او كرة لما يلمسها   تتحرك. كل الامثلة دي هتلاقيها في الصور (برجاء الضغط عالصورة لعرض كل الصور الملحقة)






آلعاب للآطفال عمر 6 شهور و حتى السنة

عزيزتي الآم، اخيرا الحمد لله الاربع شهور الآولى عدوا على خير و سلام. احب ابشرك ان اللي جي بآذن الله اسهل لآن خلاص طفلك ابتدى يكبر بجد و ابتدى الخطوات الآولى في التعبير عن نفسه سواء من خلال الاشارة و بعض الحروف او تعبيرات الوجه اللي بتفهمك احتياجات طفلك. كمان المرحلة دي في تغييرات لا حصر لها في نمو طفلك من بداية المشي لبداية الكلام و الزحف و التسنين و تنظيم مواعيد النوم و النوم لساعات اطول و بداية الآكل و تحكم اكتر في عضلات الجسم و الآيدين و غيرها و غيرها من مراحل النمو اللي طفلك محتاج مساعدتك فيها عشان تعدي المرحلة دي كمان بسلام ان شاء الله.

النهارة و بكرة هنتكلم بس عن الآلعاب اللي ممكن تشتريها لطفلك عشان تسليه و تساعد على نموه الصحي خلال المرحلة دي. تابعينا عشان الفترة اللي جية هنتكلم على انشطة تانية كتير ممكن تعمليها بآيدك لطفلك.

بداية الكلام لازم نبدآ نقلل الفترات اللي الطفل بيقضيها متححد و متقيد في كرسي هزاز او كرسي العربية او آي مكان تاني ممكن يعيق حركة الطفل. البيبي دلوقتي محتاج يمرن عضلات رجليه عالزحف و الحبي و عضلات ايديه على انه يرفع نفسه لما يكون نايم على بطنه. افرشي غطا كبير عالآرض و سيبي طفلك عليه معظم الوقت و حواليه آلعابه عشان يتشجع انه يتحرك بحرية و يستكشف. لما طفلك يبدآ يسند عالكراسي و الترابيزات و حسيتي انه مستعد انه يتدرب عالمشي بلاش المشيات اللي الطفل بيتحبس جواها لآنها بتآخر المشي (على عكس الشائع بين كتير من الناس) و بتخلي الطفل يتعود انه يمشي على اطراف اصابعه بدل ما يمشي عالقدم كلها.

bad.jpg

  لو لازم ولابد يبقى يفضل المشايات اللي بتكون ليها ايد الطفل يسند عليها زي دي 

walker.jpg